你今日關注咗未？

Angelamamy：

姨甥女3歲生日，妹妹為她訂了一個立體公仔蛋糕，不但造型精緻，個樣仲好可愛，眼睛、嘴巴與鼻子的比例適中。如此得人鍾意的蛋糕公仔，是靠做餅師傅逐吓逐吓將忌廉唧上組合而成，內裏則靠海綿蛋糕及白朱古力條支撐，師傅實在功不可沒。忘了告訴大家，蛋糕味道十分不錯，唔係淨係得個樣。

晴：

返咗工3個多星期，一切開始上軌道。除了打稿，其餘時間都在外採訪或搜集資料，短短時間跑了很多地方，認識了不同的人，很愉快。某日，採訪的地點在佐敦，一個我很久沒有踏足、卻有很多回憶的地方。重遊舊地，想起中學時代的青葱歲月。走到寶靈街，盡是熟悉的餐館，想起那些年我和姊妹們每天研究到哪裏食Lunch，牛屋、仙跡岩、新森林……但我最愛的，仍是「澳牛」的炒蛋多士。

金枝：

以前唔明點解女人咁鍾意買唔同味道的香水，最近睇電視劇才知，原來唔同嘅氣味係有唔同嘅Message。唔單止咁，根據我的親身經驗，有啲氣味仲會令人欲罷不能，而我最近就愛上了一陣體臭：家中小狗「黎彼得」每次瞓醒覺，身體都會傳出一陣焗住好耐嘅體味，猶如着咗好多日嘅臭襪一樣，我就最鍾意喺呢個時候聞佢肚腩，好似啲媽媽好鍾意聞初生Baby啲乳臭味一樣，索一索舒筋活絡呀喂！