三招打iPad　Archos 10. Internet Tablet

on.cc 東方互動主頁

自iPad誕生後，其他平板電腦生產商隨即展開攻勢，只是目前iPad的銷量已經去到200多萬部，地位似乎未被動搖！不過ARCHOS推出的10.1吋101 Internet Tablet，不但比iPad更薄更輕，售價更便宜超過千元，好有機會成為新一代iPad殺手。

貫徹ARCHOS的產品風格，101 Internet Tablet使用16:9多點觸控顯示屏，打機睇片都啱啱好，最緊要係機身又扁又輕，就算女仔攞都唔覺重，而且10吋篤芒又大又靈敏，用來上網打字就更加爽，仲針對住iPad設計上的缺點，加入唔少必殺技。

內置鏡頭上網即Chat

雖然iPhone 4力推FaceTime視象通話功能，但唔知點解iPad時就連鏡頭都冇個，只可以靠文字跟好友溝通，表達上自然唔夠生鬼好玩。針對這個問題，採用長方形橫向設計的ARCHOS 101，就於機身左上方加入一個前置WebCam，只要利用Wi-Fi或藍芽Tethering上網，就能使用內置的Fring軟件，輕鬆跟遠方好友見面對談，配合機背的多角度支架，還可以將部機放置於桌面，傾偈睇片都更方便自然，當然各位一樣可以上網登入Facebook、Twitter、微博等繼續緊貼好友近況，拉近大家的距離。

USB接駁擴充容量

iPad另一自閉設計就係機身除了SIM卡插槽外，便不設任何USB或記憶卡連接介面，就算額外加錢購買轉換器，都只能夠讀取到指定格式的相片和影片，要跟朋友分享檔案時勁唔方便，更莫講話接駁硬碟來擴充容量。相反，ARCHOS 101就內置了一個USB 2.0及Micro SD卡插口，可以隨意接駁USB裝置或記憶卡存取任何資料，設計靈活有彈性得多，又可以將重要檔案備份到外置儲存，所以就算機身只內置8GB容量都唔怕唔夠位；仲可以透過HDMI mini接口，將影像以最高1,280×800的高清解像度輸出至LCD TV，一家人坐定定齊齊睇相播片。

專用AppsLib 軟件齊全

好多人買iPad都係諗住用佢來睇片聽歌，或者上AppStore單撈Apps，呢方面出開PMP的ARCHOS一樣唔輸蝕，除擁有自家設計的多媒體程式來負責相片、影片及音樂播放外，用家還可以透過專用的AppsLib，下載近5,000種由ARCHOS發展的Apps來強化此機功能。同時由於轉用了Android系統的關係，今次還增設Android Market服務，接通埋擁有8萬多個Apps的Andriod程式庫畀大家慢慢揀。值得一提的是，最快本月底系統將升級到Android 2.2（Froyo），之後便可直接上網玩埋Flash遊戲或觀看短片。