番鬼版潮州凍蟹　阿鵬話掂！

一個「潮」字，引發很多聯想，像將軍澳這間新餐廳，取名「潮人飯堂」，據老闆話可以指新潮的，亦能說是潮州的，喜歡解作甚麼都沒所謂，最緊要有自己風格；同樣地，「講波佬」阿鵬（陳樹鵬）亦深明形象的重要性，憑着生鬼搞笑成功入屋。今次就請這位祖籍潮州的大丈夫「落場」，一試新「潮」番鬼佬凍蟹。

自小練成吹水大法，阿鵬隨時可以講幾個鐘；講波時對白又啜核抵死，成日笑到大家肚痛。近年佢仲踩界，主持埋飲食節目，邊食邊講，精彩絕倫，連同其他主持，產生美食化學作用。

傳統菜式　注入新意

一開波，阿鵬即表明：「爸媽都係潮州人，所以我都係純正潮州人，唔係Mix嚟。」小記聽後不禁流汗，在假設會被他帶往「遊花園」的危機下，問問潮州人的飲食習慣，誰料這位仁兄卻沒有玩插花，反而單刀直入：「潮州人好鍾意喺屋企食飯，感覺溫馨啲。屋企人好傳統，例如媽媽每朝會煲潮州粥，但我嫌口感似漿糊，要加水溝稀嚟食。飯後也愛來杯功夫茶，多數飲鐵觀音，消吓滯。」

出街食飯雖嘗不到鵬媽的手藝，但阿鵬來到這潮人飯堂，一樣食到家鄉味，像這裏會沿用獅頭鵝炮製滷水鵝，還有普寧豆醬、潮州梅、拉麵、麵線及醬料等，都是從潮州運來。不過，既是新派餐廳，也為傳統菜式帶點新意，像升了呢的凍蟹。阿鵬一見大蟹即叫：「嘩，平日隻凍蟹多數係花蟹，但呢度用溫哥華蟹，味道特別鮮甜，啲肉又結實，就咁食已經好掂！仲有法國睡蟹揀添，真係不得了。」

潮粵合璧　滿足大家

見「吹水王」答得有紋有路，小記即以快打快，再問潮州菜的特色，阿鵬就話：「其實菜式都幾多元化，淡味、濃味，甚至辣味都有。講開潮州菜，我就最鍾意去打冷，不時會去荃灣、九龍城附近啲打冷舖食，貪收得好夜，方便我放工消夜，必食凍蟹、滷水鵝、掌翼及烏頭等。」雖然鍾意打冷舖有風味，但阿鵬指地方簡陋，唔似呢度裝修摩登，可以舒舒服服食餐飯。

學阿鵬話齋：「依家啲打冷舖，唔止潮州人幫襯，所以菜式都幾大包圍，粵菜都有得食。」這飯堂的「潮」除了潮州，還可解作新「潮」，供應多款獨家創意菜，滿足食客要求，像薑汁芋絲撈起、明爐豆腐魚雲雞、話梅肉鬆明爐烏頭魚、潮州怒漢炒麵、高纖粗麥叉燒包等，實行「潮」「粵」合璧，加埋枱上包浩斯風格嘅金屬型格茶壺，飲杯清香的玄米綠茶，首次幫襯已經留下深刻印象。

陳樹鵬近況

現為有線電視球彩台主持，節目包括《球彩俱樂部》、《超級星期六》、《快樂星期天》及《美食法庭》。其中10月24號的一集《美食法庭》更會直擊阿鵬的韓國美食之旅。

查詢：2497 8188