歎唔願落車Nissan Elgrand

on.cc 東方互動主頁

廠商設計每款豪華MPV，都為求造出至歎、至舒服嘅貴賓級車廂，令乘客以至司機都可以受惠。日產（Nissan）嘅全新Elgrand就係最In、最佳示範，廠方強調以高檔MPV做定位，加入大量豪華設備唔在講，而且強化埋車身結構，以及增加行車寧靜度，舒服成咁，真係驚唔捨得落車。

先睇新Elgrand嘅尺寸，車身長度及闊度分別增加120mm及55mm，高度低咗105mm，整體嚟講，令車廂得以擴充外，仲可以降低重心，提升行車穩定性，加埋低地台設計，小朋友同長者上落車都安全啲。至於車頭嘅引擎艙、車側趟門，以及底盤都加入高效能嘅隔音及抗震物料，車頭大銀幕用埋特製玻璃，從多方面減低風噪，高速時車廂依然靜到圖書館咁款。

開趟門按掣搞掂

作為MPV，車廂係最重要嘅評分項目，新Elgrand就裝咗三張Ottoman座椅，分別係中排兩張、前排助手席一張，設計師亦特意拉闊腿部空間，就算放平都唔會頂腳，尤其是中排有獨立肩膊承托，有效支撐人體上半身嘅重量，舒服指數比得上梳化及大班椅，至於天花板嘅10吋屏幕，就為中、後排乘客提供視聽娛樂。最體貼係全球首創一按式電趟門開關，從此開門唔使再用力，當閣下Shopping後拎到成手都係戰利品，又或者女士做咗水晶甲驚刮花，呢項新設計就夠晒窩心啦！

強化隔音趕絕路噪

性能方面，3.5公升V6嘅馬力高達280ps，扭力都有35.1kgm，配合全新嘅六前速XTRONIC CVT波箱，驅動模式就由上一代嘅後驅改為前驅。試車報告可分兩大部分，首先係高速公路表現，車速大部分時間喺100km/h以上，路噪果然被大幅過濾，而且抗震能力相當高，由柏油路走到質素較差嘅石屎路，依然又靜又穩。操控方面，就算用到60km/h入彎，車身都無大幅度傾側，對高車身嘅MPV嚟講實在難得，而且CVT波箱嘅加速效率相當好，波檔連接又靜又快，揸車爽快之餘，又可以減少燃油消耗。