師傅教路 幫愛驅升呢

改車之道，唔只在乎車主Budget有幾多，仲要改得精！為咗貪型、貪快而亂改一通，分分鐘仲會影響原車結構及安全規格。好彩唔少代理都自設改裝部門，由部件至裝工都合乎官方要求，畀到改裝迷十足信心，今次就請嚟意美汽車維修顧問劉育仁師傅，分享有質素嘅改車貼士。

拎架車去改裝，除咗以原廠部件為首選外，改車前仲有唔少項目需要考慮清楚，避震就係熱門嘅改裝項目之一，目的係減少過彎時嘅車身晃動。

換硬避震 攞苦嚟辛

就算部車換咗賽車用嘅高硬度避震，唔代表入彎一定更穩、更準，劉師傅解釋：「香港好多路面都凹凸不平，唔似賽車場咁平坦，用硬度極高嘅避震，自然減弱吸震效果，坐得唔舒服之餘，仲會導致車身跳起令輪胎離地，失去抓地力，增加失控風險。此外，亦有人鍾意將車身Low到貼晒地，睇落好似好型，但係會令車身失去抗傾能力，增加行車危險性。」

真係想換避震嘅話，劉師傅建議大家選擇能夠調校軟硬度及高度嘅款式，坊間稱為「攪牙避震」；一般嚟講，避震高度比原裝離地大概降低20%已經足夠，同時仲要留意輪胎與車身嘅距離，太低嘅話，上路壆時好易會揩沙板o架！

亂加Bar數 更難操控

其實大部分嘅Turbo車馬力，原廠Setting都足以應付香港環境，不過唔少車主仲嫌未夠喉，想將馬力再推高，於是亂咁加大Bar數，咁做其實對駕駛者和部車都無着數。劉師傅認為：「馬力暴增之後，引擎承受嘅壓力都會同樣增加，若然Tune得唔好，隨時踩冧副偈。最重要係駕駛者未必一下子適應得到，技術稍差嘅話，好易會出事o架！我建議先裝番個Boost Controller，並且因應個人能力及引擎可承受嘅壓力值，對Bar數作適度調整，當然，冇需要就唔好加喇！」

改大鮑魚 先要Check尺寸

即使成功提升馬力，記住制動部分都要同步加強，最常見嘅做法係換裝大型制動卡鉗（俗稱「大鮑魚」），咁就要注意輪圈與制動卡鉗嘅距離。事關部分大型制動卡鉗與原裝嘅Size有所出入，若然輪圈嘅深度不足，轉動時就會卡住，制動力再強都得物無所用。其次，最好喺前後輪都裝同一款卡鉗，或者選擇包括前後輪嘅卡鉗套裝，因為只改前輪或後輪，都會令前後制動力唔平均，例如只改前輪嘅話，緊急煞車時，前輪制動力就會過大，對操控造成影響。

原廠包辦有保養

改車當然唔少得升級部件，劉師傅就主張用原廠部件，佢話：「原廠部件，一定經過品質檢驗，而且保證Fit到車款嘅規格及Setting，最緊要係有原廠保養，車主就放心得多。」今次我哋就搵嚟Subaru Impreza WRX STI A-Line做示範，由於原裝嘅水平對向Turbo引擎已經有300ps，又有加減自動波箱、雙出式四管排氣喉，以及STI原廠包圍、桶椅及18吋鋁合金輪圈，所以只需做適量改裝，已經好有效果。例如可更換高質素嘅頂Bar、彈簧、頭唇及氣喉裝飾等，而且由代理出手，裝工質素就更有保證。

Impreza WRX STI A-Line原裝規格表

引擎：

水平對向渦輪增壓引擎

容積：

2,457c.c.

最大馬力：

300ps/6,200rpm

最大扭力：

35.7kgm/2,800-6,000rpm

驅動：

前置引擎、四輪驅動

傳動：

五前速自動波連加減波

懸掛：

前）麥花臣 （後）雙搖臂

制動：

前/後）通風碟

售價：

$359,000

查詢：

2393 6270（意美汽車）