巧手雜作

手作產品愈嚟愈受歡迎，亦愈見精緻，我都加入手作人行列，嘗試D.I.Y.呀！

早前一家人去咗山頂廣場行街街，發現依家至12月每個月第一個星期日，都會响山頂廣場舉行雜貨手作攤檔，我對其中嘅「ZAKKA FARM•牧屋手作雜貨」特別感興趣，同店主Aka傾開，原來佢响太子道西華邦商業大廈開咗間樓上舖，旨在响細小嘅「農莊」內展示具備創意嘅產品，包括點綴家居嘅生活雜貨、店主嘅創作精品及不同Style手作人嘅精心傑作。此外，店舖更主力售賣各類坊間較少見嘅D.I.Y.素材，仲有近年OL界勁Hit嘅木刻印章、陶瓷畫製作、羊毛氈小首飾班等。店主Aka本身都係手作人，亦曾當插畫師，佢仲教我親手做俄羅斯娃娃花樽添！以後除咗行街Shopping，又多一個好去處啦！

查詢︰9726 1022

邊食邊玩過嘩鬼節

萬聖節熱潮開始殺到埋身，班「爸打」已經响fb激烈討論，話要搵晚一齊出去飲啤酒、睇表演！終於Frankie索到料，尖東美食里（即尖沙咀中心及帝國中心）响萬聖節會舉行全港第一個LED舞蹈表演，3位搞鬼嘅精靈舞者，會聯同其他嘩鬼於美食里巡遊搗蛋，又會响餐廳派發鬼馬南瓜LED燈，期間更有免費紋身及化嘩鬼妝服務，全人類齊齊扮鬼扮馬啦！

交換潮Tee愛地球

大家生活响同一地球村，依家地球先生「病情」愈趨不穩定，所以我繼續買嘢扮靚之餘，都要兼顧社會責任。鑽石山荷里活廣場舉行嘅「80後交換時尚潮」，其中「交換潮Tee慈善環保計劃」，只要由10月18日至27日捐出舊Tee，即可換取本地人氣時裝品牌Lifeteam新Tee、服飾購物現金券及優惠券等，所有回收嘅舊衫將全部捐贈救世軍再轉贈予有需要人士之用。此外，娜姐周秀娜亦會着上其設計嘅限量版Tee親自行Show，以及推出佢與Lifeteam跨科合作嘅Tee同其他潮物添，部分貨品更以低至二八折發售，環保扮靚一Take過啦！

家長增值課程

平日最鍾意約表姐行街，點知佢話今個月要閉關讀書。原來佢參加咗「新一代健康成長錦囊」家長教育課程，呢個課程係領匯非常學堂夥拍「生活教育活動計劃」响天水圍區舉辦，專為有就讀小三至中一子女嘅家長參加；透過唔同形式嘅活動及講解，畀家長學習正確嘅藥物知識、有效管教子女技巧，以及溝通方式，既可鞏固親子關係、協助子女健康成長，以及遇到毒品誘惑時識得如何面對。表姐咁好學，我都唔可以偷懶囉！

日期：10月19、21及28日

時間：9:00am至11:00am

地點：天水圍天瑞商場一樓

費用：免費

查詢：3921 0113（星期一至五，9:00am至5:00pm，公眾假期休息）