名廠雙卡機 中港通Phone易

一眾機友都知「雙卡手機」係山寨廠拿手戲，亦係經常往返中港兩地人士嘅至愛，只可惜它們擺明抄款兼掛上國產嘜頭，商務洽談時拎出嚟，的確有點礙眼。幸好隨着用戶人數激增，近年各大名廠亦終於抵唔住頸出番啲型號抗衡，好似Motorola日前就出咗部EX128，雙卡雙待加埋篤芒都係賣千鬆啲蚊，先達班山寨機睇怕要失寵喇！

好多人愛用國產手機，都係貪佢哋有雙卡雙待功能，只可惜它們除待機時間較長外，缺點就一大籮，例如介面冇變化、欠原廠保用兼嚴重抄款，因此長遠起見，都係買部名廠出品穩陣，而繼LG、Nokia及Samsung後，Motorola最近亦有全新雙卡機上市。

Motorola EX128 一按即換

既然稱得上「雙卡雙待」手機，Motorola EX128自然支援兩張SIM卡同時處於待用狀態，用戶可使用任何一張SIM卡作撥號，而別人致電任何一張SIM卡亦能隨時接通手機。

另一優點是支援多種訊息，兩張SIM卡均可收發SMS、MMS及電郵，甚至能同時連接藍芽耳機作通訊之用。而為方便切換，它在桌面提供Widgets小工具，用戶經此便能快速開關SIM卡及進行內部設定，比其他雙卡機需要逐層Menu進入，簡單直接得多。

簡約輕身 認字超強

說到機身方面，EX128採用簡約直身設計，可惜受成本所限，除了機面的金屬邊框外，其他部分都幾乎用塑膠打造；雖然耐用度是遜色了點，但好處係重量僅102g，拎上手用猶如無物。

EX128另一特色是配備了3.2吋WVGA輕觸式大芒，透過跟機Stylus就能手寫中文，實測所見認字成功率頗高，而且認到「嘅」、「鰂」等香港字，發送SMS自然更加傳神。至於多媒體功能，佢就提供300萬像素鏡頭及RDS立體聲收音機，並可播放H.263及拍攝MPEG-4影像，以入門機來說合格有餘！

其他名廠選擇

除了Motorola，近年Lenovo、LG及Samsung等大廠亦排住隊加入雙卡手機大軍，就連老大哥Nokia月前亦出咗部C1湊湊熱鬧，各機賣點都略有不同︰

用足個半月 Nokia C1

Nokia首部雙卡手機，提供兩個2G SIM卡槽，但只屬雙卡單待，要長按*鍵來切換，不過總比拆電換SIM來得方便。另外，此機賣到$498咁平已經夠晒吸引，但最大賣點係舊長壽電池，不但令通話時間長達13小時，備用時間更誇至1,152小時，計落有48日，以後去到「山旮旯」咁遠都唔使叉電。

售價︰$498

查詢︰2136 6338

冧女七彩燈 Lenovo S520

雙卡手機形象一向好「麻甩」，難得呢部Lenovo S520卻向女士出發。佢採用女士至愛嘅粉紫色外殼，並暗藏LED閃燈於滑蓋下方，每當開合、來電及接收SMS時，LED燈便會閃到七彩，最正係用戶可以自由配搭14種閃燈效果，例如逐層閃爍就知有來電，美觀實用兼而有之。

售價︰$999

查詢︰2750 1128

中英混合寫 Samsung B5722C

雙卡手機有手寫功能唔係新鮮事，但中、英文大多要分開輸入，費時失事。相反這部B5722C就支援中英文混合手寫輸入功能，可在同一介面輸入中文、英文及數字，系統會自動辨別字元種類，毋須頻頻切換輸入法，至啱中英並用嘅香港人。

售價︰$1,888

查詢︰3698 4698

高速上網機 LG GX500

最近有Wi-Fi供應商宣布打通京、滬、深、廣4地的老麥上網服務，配合埋呢部GX500就特別有用，事關此機雖然只係一般GSM雙卡機，但就罕有地加入Wi-Fi功能，速度點都快過其他雙卡機用GPRS多多聲；而且佢更內建出名網頁顯示速度快嘅「Opera Mini」瀏覽器，就算用GSM上網，速度都可以接受。

售價︰$1,880

查詢︰2555 6088

買機貼士

問︰請問購買雙卡雙待手機時，有甚麼地方需要注意呢﹖

答︰大部分雙卡手機都內置了兩組通話IC，用電量及發熱量都比一般手機高，長遠嚟講始終較容易損壞，因此選購時最好揀一些有香港保養的型號。另外，假如用戶並非在內地使用，而是經常帶去美加或日韓公幹的話，就要留意很多雙卡機都僅支援GSM雙頻，即係話佢有地區限制，買機前就要想清楚所去國家是否兼容GSM 900/1800制式喇！

雙卡唔等於雙待

好多人都以為雙卡手機，便一定提供雙待功能，其實不一定，因為雙卡機還有多個種類，其中一種就是「雙卡單待」。設計上，雖然它們都能裝配兩張SIM卡，但由於機內只有一組控制晶片，因此同一時間只能讓一張SIM卡處於待命狀態。換句話說，當一張SIM卡正在通話，另一張SIM卡即使入Call也會轉駁至留言信箱，這跟雙待機可同時跟兩個來電者通話完全不同。不過單待機有一大優點，就是輻射及用電量都比雙待機低一倍，相對來說較安全耐用。

機檔案

制式︰GSM四頻

體積︰107×57×12.8mm

重量︰102g

屏幕︰3.2吋6萬5千色TFT，240×400解像度

鏡頭︰300萬像素

記憶體︰支援microSD記憶卡 （最高32GB）

對外連接︰藍芽2.1、Micro USB、GPRS、EDGE

通話時間︰200分鐘

備用時間︰250小時

售價︰$1,180

查詢︰2506 3888

雙卡機大開眼界

所謂有光明就有黑暗，有名廠就有山寨，雖然後者的名氣及用料都被比下去，但講創意佢哋就唔輸蝕。以下精選幾台最新的國產雙卡機，等大家開吓眼界。

雙向耳筒 K-Touch D99

《國產凌凌漆》有蠱惑的槍，D99又何嘗唔係蠱惑的機，事關佢一改手機單邊耳筒的設計，機身兩邊都設有耳筒及收音咪，因此佢並冇機頂或機底可言，有來電時隨便拎起邊面都講到電話，方便到爆！而最意想不到係佢內置埋動態感應器，介面除會依手持方向改變，仲有大量體感Game畀你玩，至啱搭車時Kill Time用！

售價︰$998

查詢︰2988 8008

經典再造 KINGK K800

還記得多年前Motorola曾出過部V70，憑圓形屏幕而震撼業界，這設計山寨廠嘅K800一樣做得到，而且除金、銀兩色外，還追加玫瑰紅一色，連女用家都照顧埋。惟留意佢唔似V70咁可以180度旋轉屏幕，Keypad要推開滑蓋才搵到，抄啲唔抄啲喎！

售價︰$850

查詢︰2380 6128

劇迷專用 唉瘋雙雄

講抄款又點少得iPhone的份兒，這兩台雙卡機型號分屬M5000及F079，前者體積較大，屏幕有2.8吋 ; 後者則較為的骰，但屏幕就縮少至2.4吋。無獨有偶，兩台機都設有伸縮天線，可接收本地的類比電視訊號，至啱電視精隨街煲劇！

售價︰$498 （F079）

　　　$580 （M5000）

查詢︰2380 6128

名車倒模 拉利V998

呢部手機當然唔係法拉利出品，只係喺機面貼上車廠廠徽，並採用摩記最經典嘅「摺龜」，就連型號都改埋做V998，真係抄得好徹底。佢有齊雙卡雙待、FM收音機、來電防火牆及手機QQ等Function，並對應16GB記憶卡，規格算唔錯。

售價︰$880

查詢︰3488 4832