Keep Fit Apps隨時健身

扮靚係女士們嘅天性，你睇商場嘅化妝、護膚櫃枱成日都逼滿人就知。除咗要Keep住個靚樣，計我話個Body都要Keep，如果唔係個樣靚爆鏡但係搭個肥肚腩就大煞風景喇！近排秋風起，最啱做運動，好在App Store都有唔少Keep Fit Apps，大家不妨單撈定幾隻相關Apps，咁就可以隨時隨地做運動，好過花錢搵私人健身教練。

《Fit For Rhythm》 體感手Fing Fing

體感遊戲Hit到爆，大家想玩又唔想用幾千蚊買部電視遊戲機？無問題，可單撈呢個免費嘅《Fit For Rhythm》，裏面卡通公仔風格同《Wii Fit》似到爆，而玩法同樣激似。只要跟住遊戲指示「Fing」部iPhone，等它感應到你嘅動作，做完成套運動之後就會顯示消耗嘅卡路里，好玩又有效！不過大家一定要揸實iPhone，如果唔係甩手「Fing」跌部機就陰功喇！

下載費用：免費

過癮運動

體感遊戲PS Move、Kinect、Wii咁受女仔歡迎，所以要女士們周身郁做運動，少不免要搞吓花臣，好彩App Store都有唔少得意運動Apps，一定吸引到女仔注意！

《All-in YOGA》 自學瑜伽班

有唔少女士都會選擇去學瑜伽，雖然有導師帶住係安心同易學啲，不過要放工特登走去上堂又真係幾辛苦，咁不如單撈個《All-in YOGA》睇住學啦！《All-in YOGA》有成200個瑜伽姿勢，而且每個動作都有詳細解釋、示範圖片、短片，仲有把男聲旁白，屋企搖身一變成為瑜伽教室！如果你係瑜伽新手都唔使驚，因為《All-in YOGA》提供不同難度嘅瑜伽模式，跟住學就夠晒安心啦！

下載費用：1.99美元 （折合約港幣$15.5）

瑜伽健美

講到Keep Fit，最直接方法當然係做Gym，又或者玩女士們近年至愛嘅瑜伽，易學又可以消脂，兩種運動任君選擇。

《Sleep Cycle alarm clock》 起身好精神

大家平時臨瞓前都會校鬧鐘，估唔到連鬧鐘響聲都會影響你嘅精神。《Sleep Cycle alarm clock》係一隻可以記錄大家睡眠狀態嘅App，只要開着程式擺喺枕邊，佢就可以分析你嘅睡眠狀態，並以圖表分析你處於發夢抑或熟睡狀態。最特別係程式有一個特別的響鬧功能，即以柔和的聲音喚醒熟睡中的你，等大家起身嘅時候會特別精神咁話，成日瞓得唔好嘅朋友可以一試！

下載費用：0.99美元 （折合約港幣$7.7）

健康生活

要整個人容光煥發，除咗靠運動Keep Fit之外，健康的飲食習慣以及充足的睡眠休息都好重要，如果唔係捱壞身子加上無神殘樣就幾Fit都補唔番啦！

《Office Yoga》 影印房拉筋

做文職嘅朋友成日都坐响Office，好易腰痠背痛。但原來近至影印房，遠至(車立)口都可以幫你鬆一鬆。講緊嘅係《Office Yoga》，呢個Apps以搞笑漫畫形式，教你用盡Office嘅一切地方做運動。好似喺影印房用部影印機拉吓筋，又或者喺架(車立)入面做伸展，絕對搞笑又實用！而且仲有唔少工作小貼士，等大家可以應付工作壓力，打工仔必備！

下載費用：2.99美元 （折合約港幣$23.2）

《iFitness》 手臂大髀逐樣減

健身室最方便就係唔同類型嘅器械任你用，不過各種器械玩法都唔同，加上動輒都幾十公斤重，唔識玩隨時整親自己，得不償失。咁就要靠《iFitness》喇！《iFitness》可以話係一個健身練習嘅資料庫，有超過三百個健身練習圖，仲要全部都由真人示範，如果有啲比較難嘅動作仲會有影片添，跟住學就更容易啦！最特別係《iFitness》將不同身體部位的練習做晒分類，咁大家想修手臂抑或減大髀都無問題！

下載費用：1.99美元 （折合約港幣$15.5）

《Calorie Counter by MyNetDiary》飲食管理

連小朋友都知均衡飲食對身體有幾重要，咁大家要Keep Fit當然要適當地控制飲食。尤其依家樣樣食物都有食物營養標籤，配合埋《Calorie Counter by MyNetDiary》就啱晒喇！《Calorie Counter by MyNetDiary》可以幫你記錄一日三餐連小食所攝取的卡路里，仲提供超過二十萬種食物的資料庫畀你參考。最重要係可以計算埋你每日所消耗嘅卡路里，而且分析埋你體重嘅改變，以後減磅就有數得計喇！

下載費用：免費