武儀天下

身邊朋友睇完《狄仁傑之通天帝國》後，都話李冰冰好搶，皆因又露背、又玩東方不敗中性Look，男士當然留下深刻印象，不過我就話劉嘉玲扮演嘅武則天先係最有Impact，出親場都氣勢逼人，加上臨尾一身皇袍打扮，真箇君臨天下莫敢不從。咁正嘅角色，點可以唔Figure化，由本地薑威龍操刀，靚到嘉玲拎去威尼期影展時，都唔捨得放手！

只於首映亮相

近年嘅12吋Figure，唔係Hot Toys就係Enterbay，而且玩親都係外國電影角色，難得威龍照顧埋華語片，龍記負責人話︰「其實好耐之前，我哋都出過《中華英雄》、《重裝警察》等電影Figure。隨住中國市場開放，我們早有準備重投呢條生產線，啱啱電影公司華誼兄弟邀請設計，雙方就一拍即合。」不過龍記表示，由於今次比較倉促，因此除狄仁傑、上官靜兒及裴東來會公開發售外，武則天及沙陀只係喺首映時亮相，唔會公開發售，我就覺得嘥咗啲喎！

鳳凰展翅見心思

雖然唔肯賣，不過威龍都好大方借出武則天畀本報拍攝。就實物所見，服飾的確好誇張，皇袍由多層Layer縫製而成，表層為絹，有光澤兼柔軟；袖口位係織錦布，兼有層層繡花點綴，少啲耐性都做唔到。最厲害係背脊嗰幅鳳凰展翅圖，運用電腦車花將原隻鳳凰織出嚟，由頭繡到落尾，唔講都估唔到只係一個星期趕工出嚟。

玩Figure點少得Body，整個《狄仁傑》系列都採用威龍第3代人形素體，好處係靈活性高，而且Ball Joint位較穩固，擺得多依然腰板挺直。但話分兩頭，以今時今日Figure頭雕已達蠟像水平嚟講，威龍今次嘅作品仍有改善空間，例如武則天除咗雙眉、雙眼較似嘉玲真人外，其他部分都唔算神似，期望下次有大躍進啦！

查詢︰2771 1930 （環球模型）

同場加映：冰冰玩鞭

至於李冰冰飾演上官靜兒，佢款Figure就用較具代表性嘅東方不敗Look做藍本，服飾比較素淨，上身係白色雪紡披肩，內層係紅色腰帶配絹布長袍。身為侍衞，武器梗係唔少得，除配劍外，仲有戲中常用嘅皮鞭，後者能屈能伸，像真度相當高。