秋梨潤燥

阿媽教落︰秋風起，要食梨！因為秋天天氣乾燥，好易口乾咳嗽，而雪梨可以生津潤肺。為咗證實呢件事，專登搵中醫師同營養師兩個朋友仔，講下秋天食梨有幾好！

講起食梨，最想知就係邊種梨至最有益，我個fd、註冊中醫譚莉英話天津鴨梨比較適合秋冬進食，因為佢哋生長於河北地區，該處夏季高溫多雨、冬季寒冷乾燥，可以响呢種環境下生長嘅植物，天生已有清熱、潤燥之效，而且鴨梨含多種維他命，有一定營養和藥用價值，譚醫師話︰「《本草明新》有謂︰『鴨梨性甘寒、微酸』，具清心潤肺、利大小腸、止咳消痰、清喉降火、除煩解渴及潤燥消風等功效。雪梨同天津鴨梨嘅屬性差唔多，價值僅次於鴨梨；水晶梨嘅功效則唔及前兩者咁好，而沙梨就因為寒性較大，食用時需要特別注意，以免因過寒而不適。」譚醫師仲話中醫有謂「秋主燥」，燥邪最易耗傷人體津液，而「秋屬肺」，所以易出現同肺有關嘅徵狀，例如口乾、舌燥、皮膚乾燥、乾咳、便秘等。

避免餐後進食

從西方營養學角度又點睇？Elyze機能再生中心高級營養師Ann Lee話，一個150克嘅梨約有70卡路里，即係1/3碗飯嘅熱量，屬健康低卡、低升糖指數（Low GI）水果。「一個中型梨含約4克纖維，相若於１碗蔬菜纖維含量，當中豐富嘅水溶性纖維有助促進腸道蠕動，預防便秘，亦有助降低體內壞膽固醇。低升糖指數水果仲可以延緩血糖上升幅度，有助預防糖尿病及中央肥胖。」之不過，Ann建議大家於餐與餐之間食一個雪梨，而避免於餐後進食，仲要留意雪梨嘅高纖維量只限於連皮食，唔連皮嘅話，纖維量會少一半o架！

雪梨點食至好？

譚醫師話生食梨對喉乾、聲啞同便秘等徵狀有明顯功效，榨成梨汁則潤喉生津；將梨蒸熟或煮熟食就可以滋陰潤肺、止咳祛痰。不過梨同樣可以清熱涼血，所以血虛、畏寒、低血壓患者等食後若感到頭暈、心悸就不宜多食。慢性腸炎、糖尿病患者同孕婦就應少食，建議煲湯或隔水蒸過先食用。

雪梨燉盅（二人分量）

材料：

雪梨1個、杏仁10克、龍眼肉6粒、冰糖適量。

做法：

將梨削皮去芯，橫斷切開。將杏仁、龍眼肉及冰糖放入梨中，用牙籤固定好。放入碗中加適量水，置鍋內蒸20至30分鐘。

功效︰

每日1次，每次半個；有生津潤燥、養心安神之效。

黑豆雪梨湯（二人分量）

材料：

黑豆30克、梨2個。

做法：

將梨去皮切件，加適量水。先用大火煮沸，再用小火煮至雪梨微爛，然後落黑豆，可隨個人喜好放適量鹽或冰糖。

功效︰

補腎滋陰、生津潤燥。

雪梨瘦肉湯（四人分量）

材料：

雪梨1個、蘋果1個、無花果1個、南杏20克、北杏20克、瘦肉150克、清水7碗、鹽適量。

做法：

所有材料洗淨。蘋果去芯，切成4件；雪梨去芯，切半。瘦肉切4份，洗淨，汆燙。煮沸清水，把所有材料放入煲內，用大火煮20分鐘，再用小火熬煮1小時，下鹽調味，即可飲用。

功效︰

約350卡路里（連渣）。水果煮熟後，果糖值會上升，容易變成高升糖指數的食物，因此可加入蔬菜、粟米等平衡。

營養師提提你！

不少人喜歡以雪耳燉雪梨，通常又會加冰糖或蜜棗一起燉，不過Ann提醒大家，因為煮熟嘅水果糖分較高，所以冰糖或蜜棗要適量。

Snoopy新貨到港

講起Snoopy，唔止女性，就算好似我呢啲麻甩佬都會好歡喜。尋日行街，發現Snoopy iPhone 4 Case已經到着，一式有4款，款款都別具特色，好似有化身為太空人嘅Snoopy、亦有變身成漫畫主角嘅圖案，連平日只係配角仔嘅WoodStock，今次都擔起大旗，獨霸一款成為主角，莫講話粉絲們必搶，連我都大手入貨啦！

查詢：3102 2783

平掃童裝用品

女人行街Shopping，永遠唔會嫌攰，尤其係遇着BB服裝用品減價嘅時候！嘩，可以用筍價幫囝囝扮到靚一靚，我諗起都開心，咁啱海港城Bazaar展銷集將舉行大型嬰童服裝及用品展，雲集超過40個著名品牌，大量嬰童服飾以及各類BB用品，均以超低價發售。我要去為囝囝、姪女搶購超值嘅服裝、鞋履啦！

開倉資料

日期：10月12至17日

時間：11:00am至9:00pm

地點：海港城世界商業中心3字樓

查詢：2118 8666

伸縮床 有排用

雖然我唔會好似老婆咁，成日幫囝囝買衫執靚個外形，但都好注重囝囝嘅睡眠質素，因為瞓得好先至有精神讀書嘛！我呢輪就睇中0/3 Baby Collection最新於瑞典引入嘅Troll Victor伸縮床，床框及床底均採用白樺木，比一般質料更堅固及重身，最重要係其擁伸縮功能，長至2米都得，囝囝可用到小學！此外，床褥採用防敏感及透氣物料，具透氣、防菌、防塵蟎功能，而且床褥可作清洗，更備有30分鐘快乾功能，方便老婆清洗，佢實讚好啦！

查詢：2422 2101