黃翠如荷蘭拜見花．巫．妓

有人飛到怕，有人卻唔飛唔安樂。絕對有資格做隻無腳雀仔的黃翠如（Priscilla），本身已是旅遊節目主持，人不在旅途，也在計劃旅途中，假期金錢全花在周遊列國。伊人近期因公事暢遊荷蘭，當地的新奇人與事，繽紛如令她一見難忘的彩色玫瑰，真係瓣瓣都有不同驚喜！

歐洲開放奇幻國度荷蘭，邪惡與純真並存，毒品及性交易無處不在；卻有奪目鬱金香花田的漂亮風景，Priscilla無機會深入探討前者，卻遇上了專為花兒錦上添花的園藝大師。

奉旨發花癲

Priscilla 初以為遠赴荷蘭賞花隨時悶到發癲，誰知她賞的花是可以人工Manual操控的：「呢位園藝大師好厲害，研發出獨家秘方令鮮花開出不同顏色的花瓣，買一朵花就有齊多種顏色！有些國家一有慶典，便幫襯這位鮮花魔術師培植的國旗顏色鮮花。」

大師魔法令Priscilla驚覺荷蘭人對鮮花的狂熱程度，參觀完當地的鮮花市場，又令她了解花在荷蘭不但有美化環境的功效，更是當地重要經濟命脈：「個鮮花賣場有長洲咁大，鮮花交易電腦化，同股票交易無分別。」見識完荷蘭人點發花癲，Priscilla繼續了解當地人另一古怪點子—騎呢主題酒店。

見識騎呢事

荷蘭人早已跳出型格Hip Hotel的悶局，專挑風馬牛不相及的東西變身酒店，舊飛機、起重機，甚至救生艇都化身旅人歸宿。一大堆出奇意念，Priscilla覺得是因為荷蘭人有血有肉的性格：「荷蘭人比起其他歐洲人Down To Earth，一般歐洲人都高高在上，追捧紳士文化；荷蘭人比較率性坦白，好敢作敢為，同澳洲人有點相似。」

走在毒品及妓女橫行的阿姆斯特丹街頭，Priscilla時常被另類咖啡店飄來的怪煙偷襲，不但沒有神憎鬼厭，反而令她見識到幫襯另類咖啡店的客人，原來非清一色的瘦削癮君子，不少樣貌普通的情侶都喜歡到這種另類咖啡店Relax一下。Priscilla坦言曾有衝動一嘗加料雪糕，不過當導遊透露食後兩日都維持奇妙狀態，她最終向誘惑說不！

巫婆家作客

原來巫婆也是當地特產，Priscilla更專程到南部尋巫婆蹤迹，到一位60多歲的巫婆家中作客：「其實真正的巫婆似中醫，家中種滿草藥，並相信水晶及月亮的力量。」這位碩果僅存的巫婆，齊備所有巫婆的條件，有魔鏡、黑貓、恐怖笑聲及一個女兒，可惜其女兒沒有打算繼承母業，相反，Priscilla倒很有興趣跟巫婆學法，期望有一日像哈利波特般周身魔法！

流連紅燈區

阿姆斯特丹的紅燈區是荷蘭招牌景點之一，Priscilla竟然樂而忘返，認為妓女打扮得好靚又友善（對女人如是），還與她們交談，了解其生活：「佢地收費都幾貴，15分鐘收港幣過千，不過佢地透露通常數分鐘已完成任務，笑得我吖！」荷蘭人可謂胸襟廣闊，除毒品與性，同性戀婚禮與安樂死也容得下；當地人的開放性態度，令她大開眼界：「荷蘭人真係好開放，有些夫婦容許對方有外遇，認為屋企煮嘅飯唔好食，就要出外嘗嘗其他美食，食完返屋企研究點提升住家飯質素。」

荷蘭的一切一切，對自問思想老土兼是基督徒的Priscilla難免有點衝擊，不過她強調影響是正面的：「荷蘭人好少問Why自尋煩惱，反而成日問Why Not？我都認為成日問點解會錯失好多人生經驗，我以後會大事上堅持，小事上Why Not！

我鍾意飛

「我好需要飛，一留在港便渾身不自在，總之一有假就飛，所以儲蓄幾乎全數花在旅行上。最近同屋企人去完歐洲，好快又要去吉隆坡及韓國，正計劃再度出征歐洲。眾多國家中，最難忘是埃及之旅，嗰次我唔識游水而錯過在紅海暢泳；最近我學識咗游水，再有機會舊地重遊的話，我必定會去紅海游番夠本。」

I Paint：粉彩畫

「其實我係一個好悶嘅人，唔多鍾意出街，唱K及行街都唔啱我，因為我好慳家，唔會隨便使錢。畫畫係我唯一嗜好，任何模式的繪畫我都鍾意，近期我喜歡粉彩畫，每星期都會到畫室，繪畫我在旅途遇過的女子照片，有份報紙都有定期刊登我嘅拙作。」

I Watch：催淚電影

「《唐山大地震》並非一套催淚電影，導演馮小剛最厲害之處，是用真實及細膩的手法拍攝呢套災難片，在好細微之處都見到誠意。戲中災民的絕望無助表情，跟新聞片中災民別無兩樣，我並非眼淺之人，但都忍唔住哭了！」

I Miss：客途鄉思

「最勁試過3個月飛5次，好多時錯過重要時刻及節日，試過年初一在外地公幹，心情極度失落；又試過中秋節在巴西度過，好彩同行有香港人，可以齊齊食月餅解鄉愁。我鍾意旅行又着重家庭生活，爭取機會同屋企人周遊列國係最好的辦法。」