仲有個幾禮拜就到重陽節，好多人都趁假期登高遠足。不過所謂意外，即係有時候再小心謹慎都有機會發生。萬一手機接收唔到訊號，方圓百里杳無人煙，蕩失路兼受了傷，最黑仔的事情唔好彩發生响你身上，而最慘你又從來冇做過童軍，呢個時候除咗祈禱唸經，你可以做嘅就係攞部手機出嚟，利用不同的Apps自救。

同「書到用時方恨少」的道理一樣，有時候Apps到有需要用時，才意識到手機內有六、七版都係遊戲Apps，遇到意外時可以靠佢救命的Apps竟然連一個都冇。唔想發生呢種情況，最好都係留番啲儲存空間，放幾隻相關的應用程式傍身，像某電視廣告口號：「居家旅行必備」。

事前工夫

政府宣傳片都有教，出發之前除咗檢查是否帶備足夠物品，穿着合適服裝，最重要就係查吓天氣情況，太惡劣就要改期啦！

MyObservatory 掌握天氣情報

iPhone本身都有預載天氣程式，但想再睇更詳盡的消息，最好還是安裝香港天文台推出的《MyObservatory》，內裏有天氣預報、打風時的風暴路徑，並能透過最就近用家所在地的氣象站的訊號，報告準確的溫度、濕度、雨量、風向、風速等情報，亦有定時的天氣照片提供，出門前記緊要留意一下。

下載費用：免費

旅程必備

行慣山的人，通常會預先規劃行程，過程中也會約略計算所行的里數，自從有咗iPhone之後，無論認路、計算路程也都變得更加方便。

Trails - GPS Tracker 離線識認路

坊間有好多GPS地圖和路線記錄的Apps，雖然好實用，但萬一收唔到訊號定唔到位就麻煩，隨時行錯方向。《Trails - GPS Tracker》的獨特之處，是地圖只要Load一次，便會儲存在手機內，亦即是離線都可睇地圖。跟其他同類程式一樣，用家可以預先規劃好要行的路線，如中途有需要更改路線，只需篤兩篤便完成，事後也可睇番行程所用的時間、里數、速度等資料。

下載費用：3.99美元（折合約港幣$31）

Theodolite Free 即查經緯度

《Theodolite Free》是一款將GPS、指南針、水平儀和AR（擴增實景）等功能結合為一的程式，開着咗之後，畫面會顯示眼前的影像，用法是首先靠移動手機，將畫面上的兩個十字對齊，就可測出用家所在位置的準確經緯度、方向和高度等數值。另有付費版本，加入了拍照的功能，可以將數值連同相片一同儲存。

下載費用：免費

Mosquito Device Free 電子驅蚊

雖然現在已經入秋，天氣未算乾燥，但去到郊野地方，難免會被蚊叮蟲咬，除了噴蚊怕水和貼驅蚊貼，在iPhone上安裝《Mosquito Device Free》，都可以做到驅蚊的效果。這個程式利用了高頻音效的原理來驅走蚊蟲，無色、無味，也不傷皮膚，但缺點卻是受限於手機的電量，未必可以長期開住。

下載費用：免費

療傷求救

萬一中途發生意外，只要你部iPhone裝有以下Apps就可即時對外求救，又或參考急救療傷的方法，分分鐘靠呢啲Apps幫你逃出生天。

急救手冊 即學即施救

一般人未必受過急救訓練，當行山時意外受傷，或遇到緊急狀況，這款《急救手冊First Aid Handbook》或者就能大派用場。類似的程式多數都是用英文編寫，此App卻罕有地採用中文，內容題材廣泛，有各種急救知識，亦有「戶外意外急救」欄目，可即時查閱對症下藥的方法。

下載費用：3.99美元（折合約港幣$31）

LED Morse 閃燈發SOS

iPhone 4機背加設閃燈，若夜間在郊外蕩失路，可以勉強靠佢照明，但成晚守株待兔都唔係辦法，《LED Morse》就利用了iPhone 4的閃燈，幫你發放摩斯密碼，用家只要在畫面上輸入文字，如S.O.S求救訊號，就可控制閃燈開熄發出訊息。

下載費用：0.99美元（折合約港幣$7.7）