Konami有隻出咗N年嘅RPG叫《幻想水滸傳》，今次輪到Namco Bandai Games再度借中國名著過橋，推出中文譯名為《幻想西遊記》嘅動作冒險遊戲《Enslaved：Odessey to the West》，孫悟空、唐僧化身成身手敏捷同精通科技嘅男女主角Monkey同Trip。佢哋嘅任務並唔係去天竺取西經，而係去到150年後嘅世界打機械獸拯救人類，故事設定認真搞鬼！

老外版《西遊記》有冇保留原著嘅神韻，就要由大家親身去領略，但係不得不讚佢嘅動作設計，用上Motion Capture配搭嶄新嘅全身動作融合系統去展現角色嘅各種動作，靈活得來又唔生硬，節奏明快，打得相當爽。

唐僧轉世着Tube Top

講到明係「幻想」西遊記，《Enslaved》當然唔會照抄《西遊記》故事，洋人編劇將呢個家傳戶曉嘅故事，改編成為150年後嘅未來世界，場景亦唔再係中原，而係去咗紐約打機械獸，不過由於遊戲內嘅世界已經歷過幾十年戰亂同饑荒，機械人成為地球主宰，人類淪為奴隸，連由孫悟空託世嘅Monkey同唐僧化身嘅Trip亦係其中之一，好彩最後都走得甩。Monkey身手敏捷兼且可用如意棒攻擊，話係孫悟空託世都講得通，不過就唔知點解唐僧會轉世做女人，兼成日着住Tube Top上陣，好在佢仍然識得用金剛箍嚟控制孔武有力嘅Monkey，一齊搵路返屋企。

孔武有力食腦過關

主角Monkey左飛右跳身手一流，除咗可以用如意棒打怪獸外，仲識得使用其他武器攻擊，甚至用雙手扭甩機械獸個頭！而Trip基本上都唔使點郁，全程由Monkey保護，只係有啲特別關卡要佢使用科學技術解圍先過到關。咁沙僧同豬八戒又去咗邊呢？小記試玩咗咁耐都未見沙僧出場，反而到遊戲中段會見到由豬八戒化身嘅Pigsy，仲會一齊幫手護送Trip返屋企。至於敵人方面，幾乎清一色都係機械人同機械獸，唔知開發小組會唔會整幾隻機械白骨精、鐵扇公主同牛魔王等經典人物？

招式流暢花款多

今次遊戲製作相當認真，重金禮聘咗喺電影《魔戒》內扮咕嚕嘅演員親身做Motion Capture，角色動作唔再硬繃繃。小記無認真數過Monkey有冇72變咁多花款，但佢能使出的招式確實相當之多，可以用如意棒攻擊機械獸外，亦可搶奪佢哋身上嘅槍炮，掉轉槍頭還擊，或者變成FPS一樣控制炮台射擊地面逃走嘅機械獸，加上有得駁招玩擊，打得非常痛快，難怪遊戲未推出已經入選《Fami通》金殿堂之列，以一款外國設計嘅動作遊戲嚟講，成績已算相當理想。

遊戲檔案

類　　型： 動作冒險

開　　發： Namco Bandai Games

平　　台： PS3、Xbox 360

推出日期： 今天（10月7日）

售　　價： $350（PS3）、

$318（Xbox 360）

查詢：2725 3338