依家無論行街、搭車、食飯，都見到愈嚟愈多人拎住部iPad指指點點；原來iPad唔只可以上網、睇電子書同打機，事關Volkswagen開發咗一套iPad平板電腦專用App，全球車迷可以透過呢款多媒體互動介面，隨時隨地收睇到VW嘅新車型號及產品資訊，VW HK仲有「iSales」，買車都幫到手！

原來VW係首家開發iPad App嘅車廠，呢個App名為「DAS.」（Digital Automotive Space），可視為VW嘅專屬電子雜誌，就好似Newsletter一樣，以iPad嘅多媒體功能介紹VW嘅新車資訊及相關產品。DAS.備有五種言語版本，以季刊方式推出，仲會不定期更新資料，而且無論你做咗VW車主未，都可以喺iTunes Store免費下載。

立體視點　似足試車

DAS.嘅特別之處，係用家可以透過新穎嘅操作方式，詳盡了解VW嘅全線型號，除咗有立體及360°視點影像外，又可以透過互動介面，即時收聽、收睇車上各種系統嘅操作示範，就連引擎聲同水撥啟動聲都有，十足現場試車。而且呢個App仲同Facebook接軌，畀你同網上同好交流對VW嘅點點滴滴，車迷又可以到相關網站，下載VW嘅賽車遊戲，以及Dakar News賽車新聞，全方位跟進VW嘅最新動向。

iSales買車　隨時支援

總廠有潮流觸覺之餘，VW HK都唔執輸，採用咗名為「iSales」嘅iPad App，服務內容包括汽車銷售及售後服務兩大類別。前者就有即時報價、汽車款式預覽、配件選項，以至車身顏色選擇都有，唔使再拎住本電話簿咁厚嘅Menu揭嚟揭去，一個薄芒乜都Show晒；售後服務方面，無論係更換或者加裝零件，以至24小時路面支援等，都可以用iPad睇得清清楚楚，最實用係何時何地想搵VW支援，開着部iPad就得啦！

攝：John　模特兒：Tino（Inspire People）