但凡攞到駕駛執照，S位就一定學過點泊啦，L位就睇師傅有冇教，真正揸出街，無論出得起錢泊有蓋場，定係慳慳哋泊露天場，其實兩者都存在一定限制，泊車時都要打醒精神。今次就重點分析箇中嘅竅妙，以後泊車就定得多。

先講露天場，當中唔少係臨時性質，即係俗稱嘅「爛地場」，地面質素當然麻麻地，甚至危機處處，好似玻璃碎、鐵釘呢類輪胎公敵，就周不時會遇到，所以出入爛地場就要多加留意地面狀況，避免「中地雷」。

爛地場 車套唔慳得

泊露天場，部車長時間被曬，會對車身油漆造成傷害，日日如是唔止會變啞色，嚴重的話可以甩油，到時打蠟都救唔番；有車主為咗避曬，專揀樹底泊車，以為咁樣，車漆可以Keep好啲，實情未必，事關呢啲位特別多枯葉、昆蟲屍體，以及雀鳥嘅糞便，所以無論泊位有冇樹蔭，都係加個車套穩陣。

有蓋場 窄位咪勉強

咪以為有蓋車場話晒有瓦遮頭，就冇晒問題啦！皆因喺香港普遍有蓋場嘅車位都幾窄，就算泊到車，都未必夠位開晒車門上落，所以開車門時要盡量小心，唔好揩花隔籬部車；泊位時亦唔好貪方便、泊到出晒界，一旦有碰撞意外，分分鐘要賠錢。離開停車場時，記得留意出閘位嘅防撞柱，唔為意撞到嘅話，輕則整花泵把、重則爆頭燈，仲會畀停車場要求賠償，慘情！

泊路邊 上壆咪貪快

泊馬路邊嘅話，記得睇清楚附近有冇坑渠蓋，唔小心跌咗車匙就麻煩；泊上石壆時，就更加要步步為營，車速絕對唔可以太快，事關輪胎肩位嘅抗爆力最弱，一旦抵受唔住撞擊，就好易會爆胎呀！