今日適逢十•一假期，又係一年難得嘅影煙花好時機，不過要喺唔夠半小時嘅發放過程中，留住煙花盛放嘅一刻，一定要做好事前準備工夫。今次小記就從拍攝地點、技巧同器材等方面，教大家點樣捕捉一瞬即逝嘅煙花美景。
平時影夜景相，已經要面對手震同高雜訊等拍攝問題，影煙花嘅難度就更加高，不過依家唔少DC機仔都有提供手持夜景拍攝功能，只要配合一些基本嘅拍攝技巧及掌握好拍攝時機，要影到美麗綻放嘅煙花海，都唔係十分難的事。
三大熱點 各具特色
說到影煙花，好多人隨即會聯想到尖沙咀海傍，因為面對住港島區最具代表性嘅建築群，影到煙花之餘，又可以影埋香港夜景，構圖更完美。至於港島區嘅朋友則可以選擇到灣仔海傍，有金紫荊作為配襯，影出嚟嘅相片肯定更有氣氛。如果想影埋維港兩岸嘅景色，到居高臨下嘅山頂就最適合，咁仲唔快啲約埋好友，一齊去霸定個靚位。
招式1 腳架延長曝光
先講影煙花要帶備乜嘢器材，最緊要當然係腳架，一來唔使擔心手震影到鬆郁朦，二來孭住咁重嘅器材企成晚都幾辛苦。另外，使用單反相機嘅朋友，最好將快門校到幾秒，甚至使用B快門來延長曝光時間。小記建議帶多條快門線，咁就唔使下下按掣震到部機，對拍攝煙花有好大幫助。
招式2 黑卡影煙花海
成日見到人哋可以影到壯觀嘅煙花海效果，秘訣就係帶多張黑卡，喺間場煙花消失時，將黑色卡放於鏡頭前，然後等到下一幕煙花再起時拎走，就能拍攝出由多幕煙花盛放情景組成嘅煙花海效果。
招式3 善用煙火模式
其實影煙花唔一定要用單反，就算DC機仔都可以影得好靚。拍攝設定上，先要將感光度調校到最低，以便增加曝光時間，又可以減少雜訊。此外，可以喺備有手動曝光嘅DC上，將光圈調校至f/5.6-f/16之間，或者直接使用夜景或煙火模式，相機便會以較慢嘅快門進行拍攝。
啱用啱用
Canon PowerShot S95 $3,480（a）
要以手動操作，可以揀Canon S95，既有全手動模式，又有煙花模式，兩樣玩齊都得，仲有大光圈，可以輕鬆做到淺景深效果，影人特別靚。
Sony CyberShot DSC-TX9 $3,390（b）
如果想影埋維港全景，可選擇Sony TX9，備有一掃全景同埋手持夜景拍攝模式，霸到靚位喺放煙花前，先影個維港全景都唔錯。
查詢：（a）3191 2333 （b）2345 2966