雖然使用DC機仔影相夠方便，但來來去去都係得三兩種光圈設定，若然真係有心學習攝影，都係買番部單反好啲。擔心複雜唔識用？咁剛推出嘅Nikon D3100就應該好啱你啦，佢內置嘅Guide Mode示範模式，會圖文並茂地引導大家影靚相，絕對係單反相機初哥嘅最Guide拍檔。

喺剛過去嘅Photokina相機展上，Nikon打頭陣推出入門級單反D3100，為有意升級使用單反嘅朋友帶來新喜訊。Nikon考慮到大家對輕便相機的要求，D3100機身淨重455g，仲加入多種濾鏡，希望能以半專業的感覺帶給用家全新的拍攝體驗。

有相示範 慳工夫

仲記得Nikon於上代D3000時已經加入引導模式（Guide Mode），剛轉用單反的朋友可以藉此了解到不同的拍攝設定，對相片效果的影響，不過始終要影完先知結果，所以D3100特別為此進行改造，加入了輔助影像功能。例如要拍攝奔流的瀑布，便可以透過介面去選擇不同快門，屏幕更會提供示範圖片，顯示出不同快門設定下拍攝出來的奔流效果，一睇就知道邊種快門速度最啱你，毋須逐個速度試影，慳番唔少工夫。另外相機還會提醒你應該使用哪些按鈕進行設定，十足十一位啞老師。

對準主角 無甩拖

有用開DC嘅朋友都會知道，只要半按對焦鍵，相機便會自動鎖定並追蹤畫面中移動的主角，其實D3100同樣有此功能，於短片時啟動AF-F模式，相機就會實時自動對焦，毋須半按快門都可拍到清晰影像，而且按下方向鍵上方的紅色掣，便可即時進行全高清短片拍攝，影相拍片隨你心意。同時，D3100亦支援自動場景模式功能，只要將鏡頭對住主體，相機便會自動選用如人像、風景、微距等拍攝模式，唔使用家逐一調校咁麻煩。最後不得不提的是相片編輯功能，可即時修正及加入濾鏡，如紅眼、影像重疊，甚至移軸鏡效果都做得到，等大家盡情創意發揮。

試相區

模型效果

雖然Nikon都有推出移軸鏡，不過使用上還不及D3100內的模型效果方便，唔使換鏡，按個鍵就可以即時做出模型效果。

自動場景

開啟自動場景拍攝模式，相機會偵測到模特兒的面孔，並以最佳設定進行拍攝，相片細緻到連髮絲都睇得一清二楚。

機檔案

感　光　元　件：1,420萬像素CMOS

影像處理器：EXPEED 2

影　　　片：1,920×1,080@24p

感　光　度：ISO 100-3200、可延伸至Hi-2

顯　示　屏：3吋23萬像素LCD

儲　存　媒　體：SD/SDHC/SDXC

體　　　積：124×96×74.5mm

重　　　量：455g

查詢 ：2907 1122

同場加映:納米鍍膜 改善眩光

除了推出D3100外，同場亦有3支新鏡推出，其中的85mm f/1.4人像鏡更成為全場焦點。此鏡造工非凡，加上利用納米鍍膜改善眩光問題，增加入光量，不過售價亦相應提高。至於另一支28-300mm天涯鏡，鏡筒較長，所以在28mm廣角端設有Zoom Lock，防止鏡身向下時因重量滑出，而且配備VR II防震技術，提供4級防震。最後一支55-300mm望遠鏡頭則以相宜的價錢開售，質量並重的用家可以考慮。