有玩開NBA遊戲嘅玩家，都會覺得《NBA 2K》系列嘅操控、真實感同遊戲性都比其他同類遊戲高一班，所以都會依時依候喺每年10月乖乖畀錢購買新一集。但估唔到今年《NBA 2K11》竟然搵嚟籃球之神米高佐敦孭飛，除咗着住件經典公牛23號球衣做封面人物外，遊戲入面仲有得重玩10場佐敦嘅經典球賽，甚至親身訓練佐敦改寫籃球歷史！

以往好多NBA遊戲都買唔到佐敦嘅肖像同人名版權，就算喺遊戲入面設有NBA歷史里程碑等資料時，明明係屬於佐敦嘅紀錄都會留空。對於好似筆者呢類90年代已開始睇NBA嘅球迷兼機迷嚟講，有得用番經典嘅Full Team公牛隊打波，真係諗都未諗過。

重演10場經典賽事

《NBA 2K11》最吸引嘅新模式就係「Jordan Challenge」，可以由玩家親身扮演籃球之神，重演10場經典球賽，好似90年對騎士隊時，佐敦獨取69分嘅佳 績，又或者係96年總決賽第6場，佐敦帶病上陣苦戰由郵差馬龍同史托頓領軍嘅爵士隊，十幾二十年前嘅經典時刻，一次過返晒嚟！成功完成呢10場米高佐敦嘅經典賽事後，就可以開啟「MJ：Creating a Legend」模式，可以好似上集嘅育成球員模式一樣，將選秀後初出茅蘆嘅佐敦鍛煉成超級巨星。

儲齊成套AJ波鞋

《NBA 2K11》有得用佐敦，當然亦唔少得當年好拍檔柏賓、洛文同古高等出場獻技，遊戲入面仲收錄咗85-86、89-90、90-91、91-92、94-95、95-96、96-97同97-98年這八支經典公牛隊，等大家可以跟當年嘅死敵超音速隊同爵士隊鬥個你死我活。同以往嘅NBA系列一樣，每達成一定條件後就可以得到Bonus，今集嘅獎品更係歷代Air Jordan籃球鞋，除咗可以儲齊成Set Air Jordan外，為球員穿上後仲會提高能力值添！

玩Fade Away跳射

除咗有佐敦壓陣外，《NBA 2K11》亦將遊戲系統改得更盡善盡美。今集比較明顯嘅改動係提升咗球員運球嘅動作，帶波時插花同換手嘅動作更加暢順，仲可以配合埋唔同嘅手勢指揮隊友走位，好有真實感。另外，射波招式亦有更多花臣，加入咗逾10種上籃以至跳射等新動作，甚至可以做出如佐敦般出神入化嘅Fade Away跳射。至於上集大受歡迎嘅「My Player Mode」育成模式，今集亦得到強化，由選秀會開始經過不斷鍛煉，一旦躋身成為球隊正選，仲有機會參加記者會，甚至上埋體育雜誌封面兼搵廠商贊助！

遊 戲 檔 案

類　　型：運動

開　　發：2K Games

平　　台：Xbox 360、PS3

推出日期：10月8日

售　　價：$379（Xbox 360）

$399（PS3）

查　　詢：2290 9333