27/09/2010

播放本新聞相關短片

35X長炮 打雀冇甩拖Canon SX30 IS

假如你鍾意影雀,又唔想拎住近10公斤嘅拍攝器材,相信你會選擇機身相對輕巧又Zoom得遠嘅Prosumer DC,而Canon最近推出嘅PowerShot SX30 IS就能符合以上條件,標準機身已支援35X光學變焦,用來「打」雀夠晒方便,加上內置超微距拍攝功能,連甲蟲都影到,最啱熱愛生態攝影嘅拍友。

用Prosumer DC打雀,最麻煩就係變焦速度唔夠快,諗住Zoom到最遠對焦拍攝時,隻雀仔多數已經飛走咗,於是又要拉回廣角端重新搵過,最慘就係雀仔唔等人,結果來來回回幾次都影唔到一張相。

創新變焦構圖輔助

不過利用SX30 IS嘅變焦構圖輔助功能,就可以輕易解決影雀嘅問題,每次Zoom完發覺畫面見唔到雀仔時,即刻按實機背右上角嘅捷徑按鍵,鏡頭就會隨即返回其中一個較廣角嘅預設焦段,方便各位從廣闊的視野中尋找,搵到拍攝主體後就可以鬆開手,咁鏡頭便會返回原本較遠嘅焦段,節省人手調校變焦桿嘅時間。大家更可於拍攝前預先調校不同的焦段作為構圖輔助範圍,以後就能更快捷對準主體。

24mm廣角 0cm超微距

既然SX30 IS配備24mm至840mm鏡頭,防震系統一定要有番咁上下,先可以避免遠攝時出現手震,今次鏡頭內置嘅光學穩定系統,提供4.5級防震效果,即使以1/10s快門拍攝,影像仍能保持清晰。除此之外,SX30 IS亦有專為生態愛好者而設嘅0cm超微距拍攝功能,只要以24mm廣角端拍攝並啟動超微距功能就用得到,配合USM低噪音超聲波馬達,高速對焦時都唔會騷擾到拍攝主體,用來影花蕊或微細昆蟲都得,機頂仲配備熱靴插位,加番支環形閃燈就可以為花卉補光,咁拎住DC影相,都可以有單反質素。

扭芒自拍影合照

為配合機背嘅2.7吋扭芒,SX30 IS提供咗3種自拍模式,分別以人臉、笑臉或眨眼為偵測指標,以人臉自拍模式為例,相機會等到有新臉孔入鏡後,才進行對焦及拍攝設定,然後等多2秒先自動開啟快門影相,用嚟拍攝大合照時,就可以等埋攝影師入鏡齊齊影,唔會少咗個人或者次次搵人揸機咁麻煩。另外,此機具備動態偵測技術,只要半按快門鎖定主角,相機就會自動追焦,咁小朋友點走都影得到。

試相區

機檔案

顯示屏:2.7吋23萬像素

感光元件:1/2.3吋

焦距:24-840mm(35倍光學變焦)

光圈:f/2.7-f/8.0

解像度:1,410萬像素(影相)

    1,280×720@30p(拍片)

感光度:最高ISO 1600

體積:122.9×92.4×107.7mm

重量:552g

查詢:3191 2333

Chloe