好多朋友都鍾意儲舊物，可能係因為一個有意義年份，亦可能因為一段深刻嘅回憶。喺灣仔發現咗一家懷舊小店，走一轉就好似重溫段段回憶咁……

有時睇吓朋友儲嘅舊嘢都幾有趣，因為一啲對我嚟講好普通嘅舊物，對佢哋就好有意義，好似走入呢間「nlostnfound」懷舊小店，裏面真係乜嘢舊物都有，有舊上海家具、陶瓷娃娃、打火機、火柴盒同埋地球儀。店主Shirley細心為我介紹每件貨品，先發現原來件件都有佢哋獨特嘅歷史意義，行一圈就好似時光倒流咁！店內舊物都係Shirley親自喺世界各地搜集返嚟，原則係一定要自己鍾意先入，所以有啲嘢佢都唔捨得賣，而且Shirley會同客人傾偈，睇吓客人係咪呢件舊物嘅「最適合主人」，因為佢希望客人係真心鍾意佢哋。嗱！以為「有錢使得鬼推磨」嘅朋友，可以唔使諗啦！

Shirley開咗個blog講舊物故事，最近就講緊一個70年代製嘅中國小雞燈嘅故事。www.nlostnfound.blogspot.com	小店位於灣仔進教圍，店內布置清雅，有種寧靜閒適感覺。	Shirley鍾情於貓頭鷹物品，兩款錢罌都係外國銀行嘅出品，而且都印上銀行嘜頭，可反映出產品年份。 $200至$400/件
放大圖片	嚟自狄更斯小說《Oliver Twist》嘅Fagin（左）及The Artful Dodger陶瓷公仔，係1930年嘅出品。 $800/件	安全火柴發明前，為免火柴隨時劃着，就會將火柴放响金屬盒內，呢兩款嚟自上世紀嘅銀製火柴盒，手工相當精細，而盒底設有坑紋供劃火柴用。豬仔款（約1900年出品）$800、花紋款（約1920年出品）$1,000
進入打火機年代，煙民愈嚟愈多，廣告商就諗到响打火機上宣傳產品，於是打火機嘅設計多數係平面方角嘞！$250/件	鐵皮玩具多士爐係1940年上流階層嘅小朋友玩具，由日本製造，仲有埋包裝盒，珍貴到爆！$1,000	店主以前好鍾意用半格相機周圍影相，Olympus-Pen半格相機曾經陪佢「出生入死」。$800
唔少人都鍾情舊上海嘅西式家具，呢款似蛋糕架嘅茶几，枱邊嘅金屬圓點同埋鳥爪狀枱腳，均顯出做工精細呢！$8,800	齊賞非賣品 日本彈珠機係店主朋友轉讓，真係可以玩o架！	齊賞非賣品 半格相機袋有磨損紋理，係Shirley嘅珍藏之一。

撐本地設計師

Shirley嘅小店亦寄賣由本地設計師設計嘅產品，係店內唯一嘅「新嘢」！

Jellyfann手作布公仔，可以做掛飾。$165/件	單車主題Tote Bag同Wine Bag，全部嚟自What about black嘅設計。Tote Bag $300Wine Bag $200	放大圖片

眼睛遊法國！

成日都好想去旅行，但係要湊仔，老公又成日唔得閒，想去個悠長假期都幾難。不過，我份人好阿Q，冇得親身去，睇旅行書、雜誌或旅遊節目都一樣啫！最近行書局，見到旅遊寫攝人Celia鄭幗恩又出咗新作，唔經唔覺佢嘅「C遊幗度」系列已經出到第6集，今次仲走出亞洲去到法國西南部波爾多同普羅旺斯，仲換上新主角潦倒攝影師Sky，佢無意中到法國波爾多工作，踏進葡萄酒鄉世界，甚至走向南法普羅旺斯等多個地方，有故事又有靚相，睇完即刻心曠神怡。

《法國幸福鑰匙》 作　者：Celia鄭幗恩 出版社：知出版 定　價：$78

「歡樂早場」 日期：10月1日至11月19日 地點：香港電影資料館電影院 票價：$20 查詢：2739 2139

陪媽子歡樂早場！

媽子就嚟生日，我同老婆一早諗定送咩禮物，不過，老人家最想梗係子子孫孫陪佢過生日啦！咪以為我粗心大意，旨意老婆諗去邊度玩，其實我一早諗咗陪媽子見佢偶像寶珠姐啦！皆因香港電影資料館响10月1日開始舉辦「歡樂早場」，精選唔同年代嘅經典粵語片，讓觀眾重溫睇早場嘅情懷，媽子作為寶珠姐粉絲，梗係必睇《迷人小鳥》，有着住空姐制服嘅寶珠姐，同埋扮學生機師嘅呂奇，咁嘅卡士，媽子一定眉開眼笑啦！