如果大家已行厭大型商場，唔想再逛嚟逛去都係千篇一律嘅連鎖店，不妨學我轉戰太子三街喪拚，由大埔道開始行到界限街，直落到花墟前嘅運動場道，咪以為三街相隔甚遠，其實距離只不過三個街口，識貨之人更視呢三街為「鐵三角」，皆因當中有不少筍舖，出口店、手工藝品店、日本水貨衣飾精品店各有特色，買到笑騎騎！

大埔道 出口貨辦王

第一站帶大家去太子與深水埗交界嘅大埔道，呢條街又被稱為出口店街，皆因出口店多又夠集中，而當中一間屹立10多年嘅「聯發行」，從90年代初已售賣歐美出口大牌，近年更加入日本、韓國及澳洲品牌，可謂潮人尋寶之地。

美牌Crewcuts中童格仔恤衫，男女合穿。$100-$280（a）

女士最愛嘅Rif Curl沙灘短褲。$69（a）

店主Eric表示：「唔識貨嘅人會以為出口店係賣冒牌貨，當然唔係啦！我開店十幾年，全店都係各地牌子Deadstock，但當然係過季Item，你求其搵件衫摸上手，再睇埋洗水嘜，就知道係堅定流！」

最抵！	呢間「雜貨舖」內每一件「貨品」都由人手製造，需經過至少四重上色，製作期要四個月。$4,800（b）	放大圖片

界限街　迷你手工藝

同大埔道一街之隔嘅界限街，附近酒吧林立，出奇地於轉角位出現一間售賣懷舊玩具、陳年可樂罐及手工藝擺設嘅「俊山手工藝」店舖，店主阿Sam直言：「我唔係賣玩具，我賣情懷！」

阿Sam表示這間「藥材舖」由資料搜集至製作，足足花了一年時間才完成，每一細節都幾可亂真！$6,800（b）	呢個「錦鯉魚池」，阿Sam話足足用咗半年時間製作，要逐條「錦鯉」細心擺放，才造出栩栩如生嘅效果。$2,400（b）	呢套酸枝傢俬擺設細節位做得十分精緻，係近年店主阿Sam嘅得意之作，喜歡中式傢俬的朋友，必定喜歡。$4,800（b）

原來阿Sam本身係手工藝迷，開設呢間店舖純粹為興趣，「呢個舖位對我充滿回憶，前身係一間超過49年歷史嘅士多，嗰時我每日放學都嚟買零食，直至出嚟工作，士多老闆就轉租畀我，而我就決定開設手工藝店，售賣我嘅心頭好，每一件手工藝擺設全部由人手做，完成後上色，最少花四個月時間才完成o架！」所以一套每每賣幾千蚊。

放大圖片	$490	每季都會出類似款式嘅Grin乾濕褸，最啱呢個打風季節穿着。

運動場道　日產少女服

走到運動場道，不難發現該處近年開咗不少主題食店，但當中卻有一間門面純白色無店名嘅日本水貨舖，不足200平方呎嘅小店內主打日本少女服飾，店主Jo表示引入日牌服飾，除因為個人喜好，主要原因係日本設計及用料優質，而且款式長青，例如Natural Laundry及Grin嘅質料手感相當幼滑，穿上身夠通爽。Jo話：「我每季都會到日本揀貨，做到兩地同步發售，有啲更係限量版，例如LA Marise飯盒袋及Original Plant嘅貓貓毛巾仔，OL同學生都好鍾意，真係長賣長斷貨！」

LA Marise飯盒袋，備有大細兩個Size選擇，可作環保袋使用。$140-$300（c）	向來以得意動物作為設計主題嘅Original Plant，大玩黑貓及熊仔圖案，深得一眾女生喜愛。$198（c）	Original Plant貓貓毛巾仔，顏色鮮艷，靚到唔捨得用。$180/條（c）

查詢：（a）2777 7300　（b）3528 2000　（c）2336 3879