無論大車細車、貴車平車，車身保持「閃令令」，甚至「令」到照鏡咁款，成個Look都Sharp醒過人，揸出街都威啲！除咗幫襯汽車美容店，其實打蠟DIY都幫到部車光潔如新，而且做法唔算難，只要揀啱天時、地利，再加啲耐性及搵啱用品，就可以幫部車日日Keep住靚啦！

女仔扮靚睇心情、汽車扮靚就要睇環境，就以打蠟為例，首要事項係揀地點！千祈唔好喺無遮無掩、陽光又猛嘅地方洗車或打蠟，事關容易起水漬，最攞命係車身曬到火合合，影響到車蠟嘅附着力，打蠟效果就會差啲，仲會冇咁「襟」！況且烈日當空下打蠟，你唔怕中暑咩？

上蠟先洗車 防刮花

點先算係理想嘅打蠟地點？其實唔難搵，只需環境清潔企理，最重要係通風良好；打蠟前記住先將車身徹底清洗、抹乾，確保趕走晒表面嘅細沙、灰塵，乾晒之後先好上蠟，否則會整花車身。

各類型車 揀蠟有法

揀啱地方仲未夠，搵啱使嘅車蠟同樣重要。車蠟主要分類有固體及液體兩種，再細分嘅話，仲有粗蠟、白蠟、蕉蠟、拋光蠟同封釉蠟五種，揀錯嘅話，唔只令車身花上加花，甚至會變色，弄巧反拙。

一般嚟講，大家可根據車蠟嘅作用特點、車輛嘅新舊程度、車漆顏色及行駛環境作為揀選車蠟嘅考慮，好似粗蠟有起迹、淡化花痕及氧化層嘅作用；白蠟就有輕度去污，以及恢復原有光澤；蕉蠟、拋光蠟及封釉蠟都可以令車身變到水晶咁「令」，品質較好嘅蠟水，亦有防刮花、防水同防紫外線嘅效果。另一方面，深色車可選用黑色、紅色、綠色系列嘅車蠟；淺色車就可以用銀色、白色系列嘅車蠟。坊間亦有針對某種車漆顏色嘅車蠟，好似金及珍珠白等，選購時不妨多啲向售貨員請教。

打蠟四部曲

一部曲 泊車環境影響大

究竟幾時先要打蠟？係唔係每個月都要打？咁就視乎你平時點揸車，以及部車泊喺邊。如果泊有蓋停車場，而且多數喺良好嘅道路行駛，每四至五個月打一次蠟都夠。如果泊露天場，日曬雨淋走唔甩，咁就唔好懶，每兩至三個月要打一次。若然仲經常喺爛路行駛，好大機會沾到灰塵、泥沙，洗車同打蠟嘅次數自然更密。

二部曲 動作連貫咪貪懶

上蠟嗰陣，先將適量車蠟搽落專用海綿上，再喺車身細細力反覆塗抹，千祈唔好用蠻力，咁做好易令底油都起埋，搞到部車甩色咁就大鑊！如果用液體蠟劑，就唔好貪快將蠟水直接倒喺車身，以及擦兩擦又停下，會令效果大打折扣。記住打蠟嘅動作講求連貫性同耐性，付出同效果成正比！

三部曲 抹走蠟迹咪等乾

將車蠟塗勻後，等五至十分鐘，就要用乾淨嘅毛巾擦走蠟迹，部分較快乾嘅車蠟，仲要邊塗邊拋光。千祈唔好等啲蠟乾晒、甚至隔日先去清理，事關車蠟乾透就會變硬，抹嗰陣會傷害車漆，令到部車花多幾錢重。如果係白色車身仲大件事，隔日先去抹，分分鐘變咗淡黃色，走晒樣！

四部曲 趕絕蠟垢冇手軟

打蠟後，車燈、車門及尾箱等處嘅縫隙，好易會殘留蠟垢，有礙觀瞻之餘，唔及時清理仲會變成銹迹，所以打完蠟後，一定要徹底檢查清楚，將所有蠟垢統統清除。

用品推介

超艷去迹打蠟水劑

一次過做晒洗車及打蠟效果，噴壺式設計使用方便，用後車身回復鏡面狀態，仲有防水功效。$65

Pro MiraX蠟水

有助去除車身嘅細微花痕，仲有防刮花功能，適Pro MiraX蠟水

用於淺色車系。$65

Rinrei超寫像水晶蠟

內含微細蠟質粒子，令車身回復光滑，營造鏡面效果，隨盒附送打蠟專用毛巾。$105

Rinrei超撥水車蠟（水劑）

除咗有洗車及打蠟作用，仲有撥水功效，令雨水快速溜走，避免車身起水漬，有效期長達三個月。$65

Rinrei白艷及黑艷打蠟膏

專為白色車及黑色車而設，有效淡化車身嘅細微花痕，變番新車咁青靚白淨！$95

Rinrei拋光蠟

成樽洗面膏咁款，其實係車用拋光蠟，用法係先將適量車蠟塗喺車身，五分鐘後再清理，就係咁簡單。$95

Jabb吸水布

打蠟前要洗車，仲要將水分完全抹乾先好上蠟，呢款吸水布具有超強吸水力，好幫得手o架！$39

Carmate除花痕水蠟

盒內附有兩支唔同功用嘅蠟水，1號係粗蠟，用嚟淡化花痕及去除氧化層；2號蠟水就係恢復車漆嘅原有光澤。$85

產品查詢：2392 4244（台日）