今年係「一代武神」李小龍嘅70歲冥壽，紀念活動浪接浪，《精武風雲》就由甄子丹重演陳真，見佢喺預告片打到拳拳到肉，未入場先興奮；套戲聽日公映，Figure亦已同步接受預訂，呢款12吋陳真用盡Enterbay嘅真功夫，頭雕似足「宇宙最強」，就連丹爺都留咗10隻畀自己，可想而知有幾「真」！

丹爺微博關注

動漫節殺出嘅葉問Figure，銷量及人氣都令Enterbay雙贏，陳真繼續呢條成功方程式，再度以丹爺嘅戲中造型作藍本，並由J.Y. Park雕頭，吸收咗上次嘅經驗，頭雕更加Human-being，無論臉上毛孔、細紋或雙眉都接近真人，雙眼仲充滿殺氣，與氣定神閒嘅葉問截然不同。據官方表示，丹爺都預留咗10隻畀自己，仲日日上微博Update原型嘅最新進度，Fans們肯定高度關注。

Figure以外，Enterbay仲出埋《精武》Tee，黑白雙色，各售$228。	天山黑俠Look	頭雕比葉問時更似丹爺本人，仲要怒目而視，夠晒殺氣，如果有埋戲中「二撇雞」個Look就更正！
連袖口鈕都跟足戲服，誠意可加。	眼罩相當貼面，背後仲有橡筋，保證穩固。	黑皮衣嘅手腳關節位設有佳織布，關節點屈都唔怕爆線。

黑白雙造型

李小龍版陳真經常赤膊上陣Show肌肉，丹爺版陳真就少咗啲武夫味，反而時代感較強，戲中除咗着全白中山裝，仲新創天山黑俠造型，一身黑皮衣配眼罩，擺明向青蜂俠致敬。Figure亦有齊以上兩套衫，頂帽仲由布料及膠件合製，挺身又啱頭形，用料比青蜂俠Figure更講究。另外，為方便玩家擺大動作，Figure沿用葉問Figure嘅新ABS素體，提供15個主要關節，靈活十足，凌空飛踢都冇問題！不過受角色所限，配件冇葉問咁豐富，只有四對可換手掌連一支雙截棍，咁又啱，你見過陳真舞刀弄劍，甚至揸機關槍咩？

黑皮靴反光兼有摺紋，表面又有少少舊化感，夠逼真。

戲中陳真經常手握精武牌，Enterbay實物原大造埋出O黎，銀色跟Figure;金色跟Tee送。

查詢︰2332 3615 （Enterbay）