人月兩團圓，都要食得有分寸！
好姊妹送咗盒雙黃蓮蓉月餅畀我，老公又攞咗兩盒冰皮月餅返嚟，加埋自己又買咗一盒水果口味月餅，面對眼前美食，一向食得健康嘅我都好難忍口！奈何肚皮同屋企嘅空位已經買少見少，好在多得好朋友註冊營養師何智衡及註冊中醫師彭明慧幫手，教曉我點樣食月餅先食得健康，同埋食滯咗嘅話，點樣可以去膩清胃！大家今日中秋節快樂啦！
第1肥！
五仁月餅 油到爆炸
416卡路里/100g
雖然五仁月餅唔係用高糖分嘅蓮蓉，以及膽固醇、鹽分皆含量超標嘅鹹蛋黃製造，餡料中亦不乏健康嘅果仁，但果仁本身滿是油，加上豬膏、豬油或果仁植物油，每克油分已達到4卡路里嘅熱量，所以絕對係肥到爆！
第2肥！
蓮蓉月餅 膽固醇強
414卡路里/100g
製作蓮蓉時會加糖並將糖煮焦一點，令蓮蓉更深色，熱量自然倍升，而半個蓮蓉月餅嘅脂肪含量，已等同成人正餐分量嘅脂肪含量，佔去成人每日攝取量嘅三分一！加上鹹蛋黃含極高膽固醇，一個15克嘅鹹蛋黃，其膽固醇含量高達330微克，超過美國食品及藥物管理局提議嘅成人每日攝取嘅300微克，假如食一整個蓮蓉月餅，攝入嘅膽固醇已經係標準嘅兩倍啦！
第3肥！
冰皮月餅 糖分超多
354卡路里/100g
製作過程並無加入大量油分，所以會較傳統月餅較為低脂及低熱量，但全脂奶係主要成分之一，故含有一定嘅飽和脂肪。每個冰皮月餅含有2至3茶匙嘅油分及7至8茶匙糖分，所以一個冰皮月餅嘅熱量，已相當於一碗半白飯！
同場加映：茉莉花茶消膩滯
中秋節食得甜膩食物多，容易飽飽滯滯，註冊中醫師彭明慧教曉我一道製作容易又有效嘅「茉莉花決明子茶」，有效潤腸通便、降脂消膩o架！
材料：茉莉花 6g、決明子 30g、烏龍茶葉 6g
做法：1. 先用500毫升水將決明子煲滾，滾後轉中小火煲約30分鐘。
2. 將決明子水加入茉莉花和烏龍茶葉，焗泡即成。
健康月餅唔健康？
近年坊間多出現標榜低脂嘅月餅口味，例如水果、茶味等，但係咪真正低脂呢？根據國際食品法典委員會和香港營養標籤及營養聲稱的規定，低脂肪定義係指每100克嘅食物含不多於約3克嘅脂肪，所以市民可從月餅盒上嘅營養標籤上睇清睇楚！
鳴謝︰註冊營養師何智衡、註冊中醫師彭明慧
半價買歐洲BB床
身邊好友開始步我後塵，生兒育女，亦開始煩惱買BB用品、家具。最近畀我八到德國品牌Sebra嘅延展嬰兒床，只需於店內購物滿$500，就可以半價購買啦！嬰兒床嘅床身可延展至150厘米，配合寶寶成長需要，而床身採用出名堅固耐用嘅歐洲原色樺木，床身油漆不含任何毒素，更符合歐洲安全標準，就算BB牙痕啜咬床欄，媽媽都毋須擔憂。一張床可以由初生用到牙牙學語，計落都唔貴呀！
查詢：2266 1000