本地的電話推廣服務市場發達，日日受到垃圾電話騷擾嘅朋友不計其數，尤其身在外地，用緊昂貴嘅漫遊費接聽到傳銷電話時，真係火都嚟埋。除非大家見到不明來電全部都唔聽，否則都難逃被Cold Call打中。小記今次就介紹一款港產App─《HKCaller》畀各位，佢專門負責來電過濾，最重要係資料庫齊全，仲可以免費更新添！

植入電話簿夠方便

《HKCaller》用法簡單，只需將程式嘅垃圾電話資料庫一次過匯入iPhone電話簿，一旦有Cold Call來電，就會好似平時來電咁，顯示出電話號碼及所屬公司，接唔接聽由你話事。

匯入資料後，電話簿就會多咗好多以「注」起首的電話號碼，代表佢哋係垃圾來電。	用家亦可舉報垃圾電話，人人都可以出一分力！	資料庫分類清晰，內容齊全！

另外，《HKCaller》最方便嘅地方係將不同傳銷電話分類，例如美容、財務等等，一目了然！當然，電話傳銷發展「一日千里」，所以《HKCaller》畀埋你報告垃圾來電，等開發者可以更新資料庫！各位只要不時App更新，咁就唔怕再受滋擾！