Angelamamy：

在都市生活，人人滾水淥腳，邊有時間放慢腳步留意身邊事物。終於，在一個陽光絢爛的雨後下午，做完訪問又不用趕時間交稿，懶洋洋地在商場內踱步，發現一盆種植在商店間的小植物，光澤油潤、青BB的，甚為養眼，仔細看還有一小小果實，原來是未成熟的百香果。難得在人來人往的鬧市商場內發現綠洲，頓時令人精神抖擻，像叉滿電般，又再向前努力進發。

金枝：

經過馬尼拉事件，令人慨嘆生命無常，同時令我見識到原來香港人很善良，而好人好事最近亦發生在我身上！上星期我阿媽唔見咗部手提電話，根據我多次遺失手機嘅經驗，應該都凶多吉少o架啦！但後來竟然有位的士司機聯絡我哋，話佢喺車廂內執到部電話，之後仲特意由又一村駕車到油麻地將電話交回，仲不收分毫酬勞！阿媽千多萬謝，我目擊一切都非常感動，所以要在這裏再次多謝佢：「呂啟成師傅，你是最好的！」

S.man：

喜歡一個人，可以沒理由；愛上鬆弛熊（即係輕鬆小熊），卻因為它夠懵夠輕鬆，閒來和同伴浸吓溫泉、跟小雞午睡、食吓士多啤梨，一副事不關己的模樣。我相信很多人都跟我一樣希望成為鬆弛熊，但事實係，現實世界有太多煩人瑣事，要做隻真真正正的鬆弛熊又談何容易？惟有天天催眠自己：我係一隻鬆弛熊，還有不時買嘢氹自己開心。今個中秋，為自己買來一個鬆弛熊燈籠，於明月高掛的佳節齊齊食吓月餅輕鬆一下！