唔知係咪擔心影響到專業形象，Canon遲遲都唔肯將反芒設計加入EOS單反系列，直至60D先順應潮流，仲加入多種創意效果及濾鏡，為用家拍攝嘅相片增添獨特色彩，節省經電腦後製嘅時間。

廠方對60D寄予厚望，包括採用7D的1,800萬像素CMOS感應器，以感光二極體設計，有效抑制雜訊，難怪感光度同樣可擴展至最高ISO12800。另外內置的DIGIC 4數碼影像處理器，配合iFCL測光系統，以及63區雙層測光感應器，能準確分析拍攝環境的光度，提供自動亮度優化，增強相片的層次感。

$8,480（淨機身）$10,980（連18-135mm鏡頭）	機頂按鈕經過重新設計，每個按鈕單獨負責一項設定，夠晒直接。	模式轉盤中有一個以「CA」標示的模式，可快速地設定Basic+創意效果。

側揭反芒 取景更易

60D使用的3吋反芒質素相當之高，提供104萬像素顯示，加上多層防反光塗膜，於猛烈陽光下都能清晰顯示，而側揭式反芒亦令拍攝取景變得更加得心應手，就算反轉部機作高炒低炒拍攝都毫無難度，同時按下Info鍵便可開啟偵測相機傾斜度的電子水平儀，保證構圖不會東歪西倒。至於機身按鍵的功能和設計亦有所改良，例如機頂顯示屏上方就設有多個按鈕，獨立處理如自動對焦、ISO等項目，相比以前兩項設定共用一個按鈕的設計，使用上更方便直接。另外，除刪除按鈕外，機背的其他按鈕都放於屏幕右側，集合多功能速控轉盤及快捷鍵，即使單手都能完成操作。

快速鍵位於設定轉盤上方，單手就操作得到。	電池手柄以側開設計，手感更佳。$1,580	於創意效果中可調校氣氛效果、模糊效果及白平衡，對於初用單反的拍友相當有用。

相片比例 由你話事

除咗拍攝角度多變外，就連相片的尺寸和比例都可以隨意調校，只要在LiveView即時顯示模式中，就可以設定不同的相片比例，連單反較少見的1:1比例都有得揀，而且介面會同時顯示裁剪框，構圖時就事半功倍。如果你喜歡拍片的話，60D亦有提供不同的攝錄像素，最高可拍攝1,920×1,080p全高清影片，仲有每秒24格、25格（PAL）或30格（NTSC）的幀率選擇。拍片要求高的專業攝錄師，還可以加裝外置收音咪，再手動調校64級錄音水平，配合新增的電子風聲過濾器，就算在嘈雜的環境拍攝，主角的人聲對白仍然收得一清二楚。

多種相片比例60D新增多種相片比例，包括這種單反上少見的1:1正方形尺寸。	創意濾鏡特效新增的創意濾鏡提供4種效果，包括黑白、柔焦、玩具相機及模型效果，用家可混合使用，保證出來的相片獨一無二。測試時使用玩具效果中的偏暖暗角效果，好有LOMO玩具相機的感覺。	人像拍攝當使用60D作人像拍攝測試相片時，即使模特兒的衣着與背景顏色相同，拍出來的相片都能保持立體感，退地更方便。

氣氛效果 預先設定

不得不提的是60D新增的Basic+創意效果，只要於拍攝前預先進行設定，無論是陰沉氣氛還是鮮明感覺都可一拍即有，唔使花時間於電腦中後製，簡單方便。唔好以為淨係JPEG相先可以在機內進行後製，此機還加入嶄新的RAW檔後製技術，能即時調整白平衡、亮度等。如果想令相片效果更誇張，各位睇相時可從創意濾鏡內，挑選黑白粗糙、玩具、模型或柔焦效果，突破單反的限制，處理完畢後還可順便為相片加入5級評分。

機檔案

感光元件：1,800萬像素APS-C CMOS

拍片像素：1,920×1,080@30p

顯　示　屏：3吋104萬像素LCD扭芒

對　焦　點：9點十字型

最高感光度：ISO 6400 （可擴展至ISO 12800）

快門速度：30-1/8000s

儲存媒體：SD/SDHC/SDXC

體　　積：144.5×105.8×78.6mm

重　　量：675g

查詢：3191 2333