19/09/2010

播放本新聞相關短片

東京直擊! TGS排成粒鐘 試《MHP3》四打屠龍

東京遊戲展(TGS)今天正式閉幕,要數全場最多粉絲、排隊等最耐的肯定是芒亨PSP新作《Monster Hunter Portable 3rd》(MHP3),在高峰期要等成個鐘先有得試玩!身為麥記屠龍團的一分子,小記當然第一時間排隊試玩,Capcom仲放風話10月日本和香港玩家有得率先下載試玩版,粉絲們又怎能錯過?

除了Capcom芒亨新作外,各大廠商今年都不約而同加推手提或iPhone遊戲,好似SQUARE ENIX出咗隻勁似芒亨嘅《Lord of Arcana》PSP遊戲、NAMCO BANDAI更將《Time Crisis 2》等經典遊戲移植到iPhone,意味着新一輪手提遊戲激戰正式展開。

《MHP3》10月有得試玩

芒亨前年出咗隻Wii版,不過玩落又點及拎住部PSP四打咁過癮,等咗咁耐終於收到風《MHP3》將於12月推出,仲會在10月讓粉絲下載試玩版。雖然刪除了水中屠龍功能,但武器就增加至12種,在大劍和太刀外加入弓、笛子等新武器,還可攜帶兩隻艾魯貓幫拖,現場試玩時就備有孤島、溪流和火山3關可揀,難度最高要數火山地圖,在15分鐘內討伐亞種龍,值得推介。

《Marvel Vs Capcom 3》等足10年

Capcom在另一邊擺出《Marvel Vs Capcom 3》PS3/XBOX 360擂台,同樣吸引大批粉絲挑機,單係美國漫畫英雄同日本街頭霸王等角色已夠號召力,加上新作同上代足足相隔10年之久,除換上新3D引擎和「3 Vs 3」戰鬥模式外,角色更多到你唔信,由阿龍、鐵甲奇俠等英雄,到遊戲角色如《Biohazard》的Chris Redfield、《Devil May Cry》的Dante都有得用,實行英雄大亂鬥。

其他手提遊戲新作

NAMCO BANDAI 拓iPhone遊戲

iPhone已成為手提遊戲界的一大勢力,NAMCO BANDAI早前都有推出《太鼓之達人》等iPhone App,今年更在會場擺設iPhone專櫃,小記試玩過《Time Crisis 2》和《高達Fighting Spirits》等,將Console精髓完全移植至手機內。

TECMO KOEI 《無雙》打到歐洲

至於TECMO KOEI則展出了iPhone版《信長之野望.全國版》及NDS《疾風龍馬傳》,同場還有快將推出的《無雙》新作《TROY無雙》,玩上手雖然都係周圍斬人,但分別在於故事背景搬到木馬屠城年代,畫面充滿歐陸風格。

日廠積極開發iPhone遊戲

過往東京遊戲展都有不少手機或網絡商參展,但大多數只擺設J-Phone遊戲,香港和外國難以使用,自然谷極都唔起。今年終於架起iPhone攤位,將大家熟悉的遊戲移植至iPhone,有些用虛擬按鈕、有些改做篤芒攻擊,耐玩性和普及性更高,是手提遊戲界發展的一大趨勢。

特派記者:Jeff