父母嗰輩最興用靈異招數嚇細路：「你再曳曳，就有鬼嚟捉你！」若換了是日本環球影城班嘩鬼，好似史諾比同芝麻街班Friends，我諗無論大人細路都會好歡迎，企定定任佢哋捉！想同佢哋嚇餐飽、玩餐飽，就快啲飛去大阪，參加影城內剛揭幕的環球萬聖節嘉年華。影城同期上映充滿異國元素的「嘉年華大巡遊」，一家大細易服出席，更可以同班嘩鬼一齊巡遊添！

雖然萬聖節有排未到，日本環球影城成班Friend早已準備搞大個Party，以鬼樣會友。這個名為「環球萬聖節嘉年華」的大派對，在9月7日已揭幕，一直搞鬼至11月3日才結束。

打扮鬼馬的賓客，有機會登上花車一同參加巡遊。

Charlie Brown的南瓜頭權杖，我都想要呀！

可愛嘩鬼

初遊影城的我，遇着哈囉喂入城，不免懷着戰戰兢兢的心情參加鬼派對。點知影城驚嚇度零，可愛度卻爆晒燈，門口有Charlie Brown打頭陣，穿上殭屍袍張開手迎賓，殭屍帽遮住招牌Barcode頭頂，即時帥氣飆升，吸引唔少女粉絲上前熊抱。進園後正式踏入一片南瓜天地，幾乎所有商店、食肆都有南瓜影蹤，甚至爆谷兜都係南瓜形狀，放眼鮮橙一片，非常醒神。

至於忠實粉絲們，就要對號入座，乖乖到各卡通人物的地盤留影。史諾比非常應節地戴上鮮橙南瓜帽，與手執南瓜權杖的Charlie Brown，站在南瓜屋前與粉絲合照。至於芝麻街班Friends亦不甘示弱，齊齊披上帥氣殭屍袍，在美式街頭與粉絲聚首一堂。節慶期間，為求讓粉絲玩得更盡興，樂園歡迎賓客穿上搞鬼服飾進場，而小朋友更有特別待遇，入場大叫Trick or Treat，更可獲卡通人物派糖果，多叫多得。除了日間的搞鬼節目，樂園晚上也繼續搞鬼，10月份每逢星期五晚都會舉行Halloween Special Night，屆時樂園將化身另一個「鬼」咁好玩的天地。

史諾比同老友記Charlie Brown，於南瓜屋前等住同你合照。	令人有衝動想搬返屋企的Ernie及Bert南瓜頭。	想萬聖節氣氛更圓滿，不妨睇埋女巫主題音樂劇《壞女巫》。

列國巡遊

一家大細顧住同卡通人物合照之餘，也千萬別錯過每日一次的嘉年華大巡遊。於荷里活區舉行的盛大巡遊，由4個主題組成，包括Hello Kitty做主角的「威尼斯的面具舞會」（Venezia Masquerade）、Charlie Brown與Lucy以國王及王后裝扮登場的「新奧爾良的Mardi Gras」、歡迎賓客癲埋一份的扮鬼扮馬大派對，以及穿上巴西嘉年華服飾的Elmo與Cookie Monster的「里約嘉年華」（Rio Carnival）。

芸芸花車中，陪我長大的芝麻街班Friends最搶眼，整輛花車洋溢熱辣巴西風情，頭戴羽毛裝飾的Cookie Monster，以及頭戴生果帽的Bert，打扮比巴西森巴女郎更Hot，與粉絲揮手之餘，還跟隨強勁拉丁舞節拍舞動肥胖身軀，台下粉絲都忍唔住腳印印。

里約嘉年華舞者衣飾誇張，令人恍如置身巴西。	不少家長把小朋友扮成巫師般入場，齊湊哈囉喂熱鬧。	威尼斯面具舞會花車充滿眼罩，洋溢一片神秘感。

食鬼落肚

節慶期間，樂園內各食肆也推出搞鬼菜式，例如專供應扒燒菜式的Side Park Grille，其重頭貴族晚餐鬼影處處。而有蝙蝠葫蘿蔔伴碟的八爪魚串燒，以及鬼影朱古力粉飄飄的Creme Brulee，美味之餘又鬼咁有諗頭。鋸完扒，囝囝囡囡嚷着要食甜品，不妨到Boulangerie歎件Cake。在Cafe逛了一圈，發現幾乎每枱都有人叫萬聖節糕點，必叫糕點包括蜘蛛網南瓜芝士蛋糕、芋頭鬼頭蛋糕，以及Boo！Boo！Brownie，每款各有鬼主意。

Side Park Grille的貴族晚餐，幾乎每道菜都有鬼影。$3,980（約HK$362）

Boo！Boo！Brownie有白色鬼影點綴。$430（約HK$39）

驚遊太空

嫌樂園的萬聖節驚嚇度不足，一滴汗都未出過？不如坐番轉今年3月才啟動的太空幻想列車。一旦坐上列車，閣下的任務就是拯救太陽。不過我實在低估了列車的驚嚇度，在途中只想不斷拯救自己！會自轉的列車，在小行星間穿梭飛馳，由於部分路軌幾乎呈90°，我坐的列車又三缺一（重量不平均，離心力更強），列車不時快速俯衝兼自轉，嚇得我尖叫兼雙目緊閉，完全錯過了甚麼太空大爆炸場景與星際美景。

嚇完仍有知覺，不妨搜購紀念品。

嚇得全程未睜開過雙眼的太空幻想列車。

喪買鬼樣

就算日圓再升，粉絲都幾難逃過喪買紀念品呢一劫，何況各卡通人物已推出限定發售的萬聖節紀念品！雖然紀念品清一色以萬聖節作主題，不離南瓜與殭屍，難得款款Sharp醒可愛，令非粉絲也愛不釋手。另外不少卡通人物都推出應節面具及飾物，方便家中嘩鬼即時大變身，奉勸各位換定多啲日圓方好入場喪買。

可愛橙色布袋內藏蛋糕，食完可以袋袋平安。$900（約HK$82）	可以着上身的萬聖節紀念品：襪$500（約HK$46）；內褲$1,800（約HK$164）	Hello Kitty的可愛萬聖節造型。 細$1,200（約HK$109） 大$2,400（約HK$218）
史諾比萬聖節系列：公仔$800（約HK$73），手錶$2,300（約HK$209），襟章$850（約HK$77）

環球萬聖節嘉年華

日期：即日至11月3日

門票：成人$6,100（約HK$555）

　　　小童$4,100（約HK$373）

網址：usj.hk

旅遊資訊

簽證：持BNO或特區護照均毋須簽證

套票：日航大阪3天逍遙遊，每位HK$3,680起，包來回經濟客位機票連兩晚酒店。

查詢：3429 1288

交通：從關西機場乘JR阪和線．關空快速至JR西九条站，再轉乘JR夢咲線至JR環球影城車站。

天氣：9月份氣溫約17℃-29℃

貨幣：$100約兌HK$9.1

時差：快香港1小時