上個禮拜連續幾日狂風雷暴，黃雨、紅雨警告沒完沒了，雖然呢兩日好番啲，不過難保下周唔會再滂沱大雨。你嘅五行屬乜我就唔知，不過無論大車細車、貴車平車，都一定忌水囉，咪等問題惡化先至整，依家就要做好汽車防水檢查，無論遇上微雨驟雨或者豪雨，都揸得好安心啦！

近期頻頻落雨，有無發現車廂滲水？有嘅話，好大可能係車窗膠邊頂唔順所至。事關呢啲橡膠圍邊隨住年月而老化變硬，甚至龜裂，尤其是長時間泊喺露天車位更就易中招。

大銀幕 波及冷氣風口

除此之外，曾經換過大銀幕玻璃嘅話，同樣有機會車廂滲水，原因可能係汽車玻璃店只係用普通玻璃膠去固定大銀幕，效果同原廠所用嘅固定劑差好遠。咪以為滲少少水唔算大件事，置之不理嘅話，車廂嘅絨面出現難睇嘅水漬，如果滲水入到冷氣風口，仲會產生陣陣「噏」味。其實換膠邊好簡單，收費亦都唔算貴，嗱嗱聲搵師傅換咗佢啦！

燈罩入水 火牛易中招

如果燈罩本身有裂痕，甚至出現入水，除咗影響照明效果外，仲好易燒壞燈膽。根據法例規定，黃昏六點後，所有行駛中嘅汽車都必須開着車頭大燈，否則遭受票控，燈膽燒咗唔係甩身藉口呀！另一方面，依家好多車都用HID頭燈，每盞燈連接一個獨立火牛，如果燈罩入水又唔即刻理，唔只燒燈膽，連火牛都有機會燒埋，到時就唔係花幾百蚊換燈膽，係要幾千元換晒成套頭燈，你話幾唔抵？

車身甩油 生銹食住上

車身上嘅塗漆，唔只為靚，仲有防止車身生銹嘅實際作用。不過幾靚嘅車漆，都有機會被沙石打花，或者因碰撞而剝落，生銹就會食住上，有礙觀瞻之餘，仲會影響車身剛性。如果只係沙石打花嘅小程度甩油，可以自行用補油筆點啲新油落「傷痕」位置；大範圍嘅話，就要去車房或原廠做噴油及防銹工程。

濕路專家 Subaru Exiga 2.0GT

落雨天揸車，除咗要防水，仲要夠穩定。富士（Subaru）嘅Exiga 2.0GT就係稱職嘅「穩陣先生」，事關用咗Subaru Symmetrical AWD四驅系統，大大減少因輪胎打滑而引致嘅風險，跣胎機會少好多。.

駕駛小貼士

標記鋼板要減速

馬路上嘅厚厚油漆標記，以及進行路面工程嘅鋼板，喺落雨天時都好易積水，因而「跣到飛起」，最好當然係避得就避，不過避無可避嘅話，就要收慢車速了。

僭建開窿易入水

如果你部車嘅「大鼻窿」唔係原廠設計，而係後天改裝嘅話，就好易入水整濕引擎嘅點火系統，輕則窒油，重則成副偈都燒埋，咪話唔危險。最好都係換番原廠頭冚，至於有意「開窿」嘅車主，更加要三思先好。

車檔案

車　型：五門七座位多用途車

引　擎：2.0公升水平對向四汽缸Turbo

馬　力：225ps/5,600rpm

扭　力：33.2kgm/4,400rpm

驅　動：前置引擎、四輪驅動

傳　動：五前速加減波

售　價：$319,980

查　詢：2511 2727（意美汽車）