近年嘅12吋Figure九成都係電影角色題材，教父、李小龍……個個經典，但角色所限，好多時Parts都少得可憐。相對起嚟，Hot Toys新出嘅《殺戮戰場》（Platoon）越戰美軍Chris Taylor，感覺抵玩得多，事關武器配件多達十幾件，而且全部比例準確、設計精細，無論係電影迷或軍事Figure迷，都會直豎拇指讚好！

Parts多 補品慳番

若果閣下係70或80後一輩，相信對《殺戮戰場》這齣電影印象深刻，呢套於1986年由大導Oliver Stone拍攝嘅戰爭片，掀起全球一片反戰情緒，Hot Toys老闆Howard亦感受甚深，事隔多年，終於將情意結Figure化。就試辦嚟睇，Chris Taylor保持HT嘅一貫功力，軍服無論剪裁、比例都有上佳水準，而且跟足頭盔、背囊、腰帶及斜掛軍袋等配件，仲有M16步槍、M72火箭炮、地雷及刺刀等大堆頭武器，玩家毋須再花錢、花時間搵補品。

沿用12吋TrueType Body，關節數量多達30個。	是次頭雕比Charlie Sheen真人靚仔好多，像真度打折扣，不過爆炸頭可以掰開再戴頭盔，夠貼服。	軍靴跟足美軍嘅越戰款式，鞋頭用皮料、筒位用布造，精細到連鞋帶都有。

太靚仔 面相打折扣

相對配件，今次嘅頭雕就失真咗啲，雕頭師係較冷門嘅Song Hye Hyun，雖然背後有JC.Hong上色及監修，但整體上跟演員Charlie Sheen唔算太似，甚至有啲美化咗，不過考慮到演員嘅知名度不高，相信各位「驗屍官」唔會太計較。反而頭部設有兩組髮型就好抵讚，平常係爆炸頭，戴頭盔時換直髮頭，簡簡單單就可以「變髮」。據知電影中嘅其他角色，包括Bob Barne、Elias Grodin及Four Lerner都有機會Figure化，都係嗰句，《殺戮戰場》嘅影迷或軍事Figure迷，儲定錢走唔甩。

HT以軍事Figure起家，武器嘅逼真度當然難佢唔倒，今次仲夠晒大堆頭。	連軍牌上嘅壓紋都做足，問你服未！	地雷系統內有引爆器及使用指南，認真得過分。

查詢︰2388 4677（玩具狂熱）