以二次世界大戰作為故事背景嘅《R.U.S.E》，英、美、法、德、意同蘇聯都有份參戰，而且設計得幾破格，唔再用RTS遊戲常見嘅戰爭迷霧系統，一眼睇晒成幅地圖，明刀明槍開打外，遊戲嘅精髓係要玩心理戰，利用各種小動作誘敵外，更要慎防誤中敵軍嘅奸計，兩父子或兩兄弟拍住一齊玩就冇咁易上當啦！

用手掣玩RTS遊戲始終唔及鍵盤加滑鼠咁爽，但又唔代表RTS遊戲唔可以搬上家用遊戲機平台。好似剛剛推出嘅《R.U.S.E》就用上新操控介面，PS3版仲可以對應到星期三（9月15日）登場嘅PS Move，拎住支Motion Controller去指揮軍隊同落指令，玩得幾過癮。

Zoom到最近時可見到士兵同軍車，畫面都做得幾精細。

將地圖Zoom到最遠，可以睇清楚敵我雙方嘅部署同形勢，夠實用。

首度對應PS Move

直接使用PS Move Motion Controller指住左上角的操控介面下達各種指令，勁有新鮮感。	爆破場面都做得幾有水準，亦忠於二次世界大戰時嘅環境。	每位軍官都以遊戲卡去介紹夠晒特別，仲要認清佢哋嘅「專長」，唔好上當！

Ubisoft之前另一款Xbox 360遊戲《EndWar》就曾用上聲控落「柯打」，到這款PS3版《R.U.S.E》就對應到PS Move全新體感操控系統，可以直接用上Motion Controller在畫面上揀選要興建的建築物同要生產的部隊外，更可以將Motion Controller移前移後做出Zoom In／Zoom Out效果，比起傳統用手掣操控更順手，好有即場指揮軍隊嘅感覺。不過話說回來，使用PS Move Motion Controller時就要吊高隻手嚟玩，而且仲要Keep住一段時間落指令，玩得一段時間都有啲攰。

戰場面積大100倍

遊戲最大突破係唔再使用常見嘅迷霧系統，即係話未行過嘅地方都唔會被遮蔽，兼可以完全睇清楚敵軍嘅部署同行動，等大家以整個戰局去制訂作戰策略。《R.U.S.E》更引入IRISZOOM引擎，可以實時將戰場放大、縮細，Zoom到最近時仲會見到坦克車同士兵嘅實況，拉到最遠又會變番「棋盤」畫面，而且無論遠近，畫面亦做得相當精細，同時亦令到戰場面積可以達到傳統RTS遊戲嘅100倍，充分展現出戰場環境同氣勢。

善擺「空城計」誘敵

一般RTS遊戲玩法都離唔開奪取資源，興建各種建築物同生產軍隊，然後大舉殲滅敵軍；《R.U.S.E》喺策略性方面就更上一層，需要利用各種計謀去完成任務，當中包括派遣偵測部隊、間諜去收集敵方情報，亦都可以聲東擊西、虛張聲勢去迷惑敵軍，然後再攻其不備，全部精髓就在於一個「呃」字。

遊戲內呃人嘅方法多不勝數，例如可以使出誘騙、派出假部隊、埋伏部隊等招數，甚至可以停止所有無線電傳輸擺出「空城計」引敵軍落疊；不過呃人嘅同時都要預咗畀人呃，因為電腦都識得使用以上招式，所以玩家就要透過派出偵測部隊以及破解敵軍嘅傳送密碼去截取情報，不過收到情報有幾真，就要自己去分析喇！

遊戲檔案

類型：即時策略

開發：Eugen Systems/Ubisoft

平台：PS3

日期：已推出

售價：$388

查詢：2341 2356