護理汽車，除咗最基本嘅換偈油、Check迫力皮，仲有好多嘢都唔可以忽略，就以輪胎為例，好多車主用到變「光頭」都懶換，實在太危險喇！如果連輪胎氣壓及尺碼都求求其其，唔理你部車有幾勁嘅安全設計、車廂又掛到滿天神佛，都難保一路平安無事。講到咁嚴重，點做先算啱？唔使愁，合迪汽車維修部嘅副主任何瑋傑先生（何Sir），就有以下貼士畀大家。

輪胎咬唔咬地，就同鞋底設計大同小異，落雨天着住對平底鞋行街，唔跣腳就怪！同樣道理，如果輪胎變咗「光頭胎」，即係蝕到冇晒坑紋，甚至見到內層嘅鋼線，喺乾燥路面都難保抓地力，何況係落雨天？跣胎機會大幅飆升之餘，如果胎面仲有破口，喺高溫狀態或經過凹凸路段時，就有機會抵受唔住摩擦及撞擊力而突然爆裂，所以未等到變光頭胎之前就要換，唔慳得！

換胎唔好等光頭

咁講法，胎紋蝕到幾多就要換呢？法例規定輪胎坑紋最少要有1mm深，不過呢個只係最低要求，未夠安全o架，大家不妨以「Wear Indicator」為準，即係胎紋內坑嘅凸起位置，如果蝕到呢個位，最好拿拿聲換胎喇。除此之外，何Sir亦建議輪胎由開始使用起計，唔好用超過三年，就算仲有小小胎紋剩都唔好慳，都係換胎為妙，因為時間耐咗，輪胎嘅橡膠就會老化、變硬，令膠質黏性大減，抓地力會大打折扣。

胎氣磅數跟指引

除咗胎紋深淺，輪胎氣壓同樣不容輕視，好多車主以為打滿氣就掂，其實錯得緊要，何Sir教路：「氣壓對輪胎嘅抓地力及磨蝕程度有好大關係，事關胎氣過多，會令胎面脹起，雖然肉眼未必睇得出，但係經過一段時間，胎面中間嘅磨蝕程度會比左右兩邊大；相反，長期胎氣不足，就會令胎面兩邊蝕得更快。兩種情況都會影響抓地力，以及輪胎嘅耐用性。最好都係按照車門邊下方嘅胎氣指引，打入合適磅數，仲要每隔兩、三個星期Check一次胎氣，咁就安全得多。」

車輪改大手尾多

為型、為貪靚，有車主換輪圈及輪胎時，刻意揀超出原裝嘅大尺碼，其實弊處多多。首先會影響汽車避震，因為要喺原來嘅輪拱空間容納大咗嘅車輪，惟有改用薄胎嚟遷就，咁做會減低行車舒適度，亦好易「揩沙板」，以及令泵把過分貼地。而且加大輪胎尺寸後，尤其是四驅越野車，好多時會增大幾吋，會同時增加引擎及波箱負荷，有機會縮短機件壽命。所以想更換輪圈及輪胎尺寸前，最好先向原廠嘅技術員諮詢意見，三思而後行。

輪胎冷知識：防士啤胎漏氣

除咗用緊嘅四條胎，原來士啤胎都要定期Check胎氣，就算漏氣情況唔及使用中嘅輪胎咁大，但係一個月都可能漏咗半磅至一磅氣壓，長期置諸不理，到換胎時先知就太遲喇！

定期換喉嘴

輪圈上嘅膠喉嘴都要定期檢查，同輪胎一樣，喉嘴膠質會漸漸老化變硬，失去彈性、變得脆弱，隨時一掂即爛，以後檢查輪胎唔好漏咗呢個嘴喇！

拔釘漏氣更快

輪胎「中釘」後，胎氣會慢慢洩漏，不過千祈唔好即刻將釘拔走，否則輪胎就好似穿窿嘅氣球，好快就無氣。如果輪胎漏氣情況嚴重，應該即時着死火燈，再慢慢駛到安全位置先好換胎。

急救法寶：AUG輪胎修補劑$98

輪胎漏氣，碰啱附近又冇車房，可試試輪胎補漏劑，從喉嘴注入，即時填補漏氣位，暫時給予少量充氣，令汽車喺慢速之下仲撐到一段短時間。

超艷輪胎光亮劑$78

唔止車身，輪胎都可以打蠟扮靚，將輪胎光亮劑噴喺胎邊位置，唔使過水，再等一陣，輪胎就會變番新淨，靚晒！

Carmate電鍍輪圈清潔劑$75

輪圈最易沾到Brake粉及塵埃，污垢自然愈積愈多，唔想有礙觀瞻，可以用呢款清潔劑噴喺電鍍輪圈上，再等兩、三分鐘，就可以清除污垢、回復光亮。

電子氣壓錶$220

想隨時檢查胎氣，呢款電子氣壓錶就幫到手，用法簡單，開啟後，將測氣嘴位套入喉嘴位置，氣壓高低即時Show畀你睇。

Check胎有法

1.何Sir提醒大家，每兩、三個星期就要Check一次胎氣，唔好偷懶呀！

2.輪胎抓地力在乎胎紋深淺而定，唔好等光頭胎先至換呀！

3.胎邊位較薄弱，容易爛，檢查嗰陣要高度留意。

4.胎氣過多或過少，都會對輪胎磨蝕及行車安全有直接影響。

5.雖然大輪胎賣相夠台型，不過尺寸太大會增加引擎及波箱負荷。

6.合迪汽車設有奧迪智能互動接車服務（Direct Reception），透過藍芽接駁廠方的網上技術支援系統，再由專業的維修顧問向車主講解情況，準確之餘，透明度高。

產品查詢：2392 4244（台日汽車）

維修查詢：2262 1307（合迪汽車）