別以為灣仔街市盡是平民貨色，識途老馬就知內裏藏寶：香料、椰汁、海鮮、靚河粉及有機蔬果等，煮大餐話咁易，而即使你不諳廚藝，亦一樣可以搵到食，皆因街口有幢食廈，雲集多間由廚藝高手開設的私房菜，最新「住戶」就有名廚Ricky的歐陸菜餐廳Le Mieux Bistro。
以花恤衫為標記的Ricky，絕非一般大廚：開咪、做電視節目、出席公開活動等，曝光率奇高，由他主理的Le Mieux Bistro自2005年開業，即使位於偏僻的柴灣工業大廈，仍然捧場者眾，間接活化工廈，好好地突然搬舖，原來是想大家放心飲多杯。
新店布置大不同
愛飲又飲得的Ricky話：「以前餐廳位置較僻，好多人都會揸車嚟，但食完飯飲咗酒，其實又唔適合揸車，所以不如為客人着想搬到灣仔去。依家呢度交通方便，食完飯坐車有好多選擇，仲同我老友Jacky（囍宴私房菜老闆）做埋鄰居添！」
新舖面積可容納40人左右，氣氛Cozy，他說：「布置同以前好唔一樣，以前餐廳四四方方，裝修一致，依家就長方形，設計師特登間成不同部分，好似有白色小廳，走廊位另有黑色卡座，然後就有梳化座位等等，滿足唔同人的要求。」
最愛用當造食材
相比環境的大變身，食物卻反而保留一貫私房菜的模式，像午市供應的4道菜套餐，分別有$140及$280兩款，6道菜晚餐則每位$680，多款招牌菜如法國鵪鶉、煎魚及黑松露清湯同樣保留，沒有教熟客們失望。
Ricky表示：「我最重視食材的質素及味道，簡簡單單的煮，可以保留原汁原味。更愛用時令食材煮餸。」當一年四季都有美食供應，更令人懷念一期一會的興奮，所以他近期便用了當造的雲南野生菇菌入饌，像雞樅菌、雞油菌等，更預告之後有蠔、松露等炮製的佳餚登場。
烤慢煮乳鴿伴煎雞樅菌（晚市套餐菜式之一）
Ricky其中一道拿手菜，在傳統法式烹調中帶點Asian Touch，乳鴿以八角、果皮、甘筍、洋葱及香料等熬的上湯浸熟，然後經煎、烤步驟，火候恰到好處，鴿肉鮮嫩無比。
San Daniele Ham配溏心蛋沙律（$140午市套餐之一）
擺放成花形的沙律，讓人一見傾心，這火腿比Parma Ham油潤軟綿，配上半熟的溏心蛋及BB菠菜，簡單的美味。
龍蝦刺身及海膽配海鮮啫喱（晚市套餐菜式之一）
這杯小巧頭盤鮮甜無比，底層的啫喱，用蝦、蟹、龍蝦及魚等熬成的凍湯加入魚膠製成，再放上大瓣海膽及波士頓龍蝦刺身。Ricky特別撒點日本青檸皮，獨特的檸香及柚子香能增進食欲。
燒牛肉（$140午市套餐之一）
美國安格斯牛肉以低溫烹調，果然入口嫩滑，一改小記對燒牛肉「柴皮」的壞印象，特別一提伴碟的番茄，酸酸的又帶點甜，很有果香味道。
香杧拿破崙（晚市套餐菜式之一）
賣相如此精美，都想一口吃下吧？鬆化的拿破崙加入清新水果，更伴有自家製Bailey's 雪糕，非常滿足。
查詢：2558 2877
Ricky好酒推介
來這裏當然要飲飲食食，喜歡飲兩杯的話，看到店內收藏甚豐的酒櫃相信會好興奮。藏酒逾150種，包括餐酒、香檳等，更不乏靚酒如Talbot及Lynch Bages等，售價比市面便宜，有些更平上一半，好抵飲。
Ricky Cheung（張錦祥）
10多歲便入行，烹飪經驗豐富，為萬麗海景酒店Scala餐廳的前行政總廚，於2005年起主理Le Mieux Bistro至今，逢星期日更會在電台開咪講飲講食。