為配合全新體感操控PS Move下周抵港，SCEH同期推出一系列體感遊戲，當中最具特色和話題性的要數《功夫滑仔》（Kung Fu Rider），竟然搵香港繁忙街道做背景，隨手拎張辦公椅當交通工具滑行，仲可以Fing手掣加速、跳躍和使出功夫撞開敵人和障礙物，刺激之餘又有親切感，香港玩家必撐！

唔知PS日本設計師係咪特別痛錫香港玩家，記得之前隻《GT4》賽車已加入香港跑道，今次《功夫滑仔》更以香港鬧市做故事背景，有埋中文字幕和說明，讓各位扮演私家偵探飛仔（Toby）和女助手家玲（Karin），喺街上滑行逃離敵人追捕，由山頂滑落去中環鬧巿的滋味只要靠PS Move就體驗到。

香港背景加搞笑工具

PS Move手掣個樣雖然似支咪，但體感玩法實際同Wii差唔多，當你拎住PS Move左右郁時，角色就會跟住左右滑行，按中間個掣仲識做特殊動作，例如在空中翻騰打圈、瞓低避開障礙物、耍功夫踢走物件和敵人等，總共要穿梭於6個不同的香港地區。小記試玩咗幾關，發覺街景有9成似中環及灣仔區，由舊街商舖、山頂斜路至商業區及海旁場景都有齊，遊戲後期滑行工具會愈出愈多，有BB車、辦公椅、手推車、玩具車等12款任你揀，等你狂Fing手掣於街道奔馳。

多條逃生路線四圍撞

遊戲途中會有錢和道具畀你執，拎得愈多、走得愈快，分數自然愈高，最過癮係唔會限定玩家嘅逃亡路線，每版都有不同出路，好似頭嗰版小記可以唔行馬路，踩入公園捷徑避開追兵，經過維修中的大廈時，更可從二樓臨時搭架再跳番落地面，遇到障礙物時更可Fing手掣撞開晒佢地，不過唔係每樣嘢都撞得開，好似遇到鐵欄或車輛等，撞埋去就會成個人瞓低，系統仲會慢動作重播你趴街個樣，到遊戲後段連敵人都識功夫，你想撞低佢，隨時畀佢拳打腳踢。

下周首賣套裝較抵

除了單人逃亡外，遊戲同時備有雙打協力模式，只不過就要買多支PS Move手掣，計落一支PS Move都要$339，套裝手掣連PS Eye鏡頭同遊戲都只係$699，似乎較抵玩。而且PS Eye除可在《功夫滑仔》遊戲內用來感應定位外，還會拍低玩家玩遊戲時的有趣影像，轉頭睇番自己個貓樣肯定夠晒搞笑。此外，9月15日開賣既另外兩款套裝還可選擇《Start the Party！》或《Sports Champions》，迎合一家大細要求。

遊戲檔案

類型：動作

開發：SCE Japan Studio

平台：PS3

遊戲人數：1-2人

推出日期：9月15日

售價：$298（淨遊戲）

$699（套裝包括PS Move手掣、PS Eye鏡頭、《功夫滑仔》遊戲）

查詢：2341 2356