去曼谷唐人街搵食？旅遊書來來去去不是介紹沙煲魚翅就是燕窩，還有新意嗎？其實只係你唔識路，今次跟住食神Michael及靚女姚子羚（Elaine），當然唔會咁行貨啦！Michael說曼谷的唐人街是他最愛之一，因有很多獨特風味美食，如粿汁粉、炭烘麵包等，令人一試難忘。我還跟他在市集間的店舖穿梭，尋找最地道的炒金邊粉及超平河粉。

雖然曼谷唐人街出名食魚翅同燕窩，但我們今次的目標卻是大牌檔！這些大牌檔都是有幾十年歷史的老字號，晚上更常出現爆滿情況，可惜店舖名字都是你我看不懂的泰文，大家惟有靠認住隔籬店舖搵食啦！

粿汁粉配胡椒湯

第一個目標是Michael大讚最正的粿汁粉，這不是甜品，而是類似福建名食鐤邊趖，在泰國只有華人聚居的地方才吃到。配上胡椒湯底，加入豬雜及燒肉等配料，粿汁粉入口煙韌，而胡椒湯底夠晒辛口，豬雜和燒肉又夠入味，簡直是完美配搭。Michael話食完出身汗，再迎面吹吹涼風最爽。

想食好味粿汁粉，就要認住呢個檔口。	粿汁粉攤檔座無虛席，想食就要等位。	煙韌粿汁粉配上辛辣胡椒湯跟燒肉豬雜，地道唐人街風味。30Baht（約HK$7.5）/碗

他又極之欣賞另一攤檔的炭烘麵包，燒麵包燒近50年的黃老闆，用上大大個炭爐來烘麵包，烘得鬆脆又唔燶，醬汁還選擇多多，有常見的牛油煉奶、咖央、朱古力醬，甚至辣椒醬添！咬一口咖央多士，脆卜卜的聲音連身旁的人都聽到，超好味。麵包檔旁還找到滷水豬腳飯，只見一鍋濃濃的滷水汁，把豬腳燜得入口即溶，肥美的皮層，入味的豬腳肉，配上同樣惹味的滷水豆腐，好味得無可挑剔。

你睇烘麵包個炭爐幾大！一次過可烘很多片多士。	炭爐烘出來的多士非常脆口，加上朱古力和咖央醬，好味到停唔到口。	大大鍋滷水汁內，是香噴噴的豬腳、滷水豆腐和雞蛋，愈煮愈入味。

粿汁粉

位置：耀華力路街尾（經過林真香往前走，左手邊第一個路口）

炭烘麵包

位置：T&K海鮮對面大牌檔

蛋包炒金邊粉

逛完唐人街，繼續掃街邊舖，Thip Samai Noodle Shop的蛋包炒金邊粉最出名，每碟都是即叫即炒。廚房就在店舖出面，見廚師一手金邊粉落鑊炒，另一邊則負責煎蛋，炒出陣陣火花，厲害！一炒好粉就立即蓋上蛋皮，極速送到人客面前。蛋包炒金邊粉有大蝦、芽菜及韮菜等材料，加些花生碎更是惹味，食時把蛋皮弄破一絲絲，跟金邊粉一齊食，入口香滑，食落甜甜的，夠晒鑊氣。別忘了柯打這裏的橙汁，不是罐裝汽水而是真正的鮮榨橙汁，用來佐金邊粉一流！

炒金邊粉食得多，未試過用蛋包着上。45Baht（約HK$11）	炒金邊粉的店舖到了消夜時間仍食客滿堂。	見到廚師炒金邊粉炒到火花爆濺，就知道幾夠鑊氣！

Thip Samai Noodle Shop

地址：313 Mahachai Road, Samranrat Pranakorn , Bangkok

電話：（66） 02 221 6280

細細碗河粉

泰國出名食嘢平，不過沒想過9蚊泰銖（約HK$2.2）就可以歎到碗河粉。今次有Michael帶路，找到位於BTS Victory Monument站附近市集的9 Baht河粉，收得平，分量自然少一些，Size只有平時的三分一，但勝在多款式，可以一次過試勻不同味道，好像冬蔭功湯底、清湯底等。配料可選魚蛋、牛丸、豬肉、牛肉，除河粉外，還有金邊粉及米粉選擇，放湯或乾撈都可。但見食客個個都柯打幾碗，難怪外面廚師對摩打手無停過。我試了5款，覺得冬蔭功牛肉米粉最正，而Michael話要打破食店的最高紀錄29碗，見他一碗接一碗食得輕鬆自在，最後輕易就幹掉了38碗！

9Baht河粉的格局都幾骨子。	9 Baht河粉有多種湯底及配料選擇。	Michael叫得食神，食38碗河粉實在輕而易舉，加埋唔駛400泰銖。

9 Baht河粉

位置：BTS Victory Monument站出，走過行人天橋往對面市集。

旅遊資訊

簽證：持BNO或特區護照毋須簽證

機票：乘泰國航空由香港至曼谷，來回經濟客位機票約HK$1,540起。查詢：2179 7700

貨幣：HK$1約兌4Baht

天氣：9月份氣溫約26℃-35℃