鈴木（Suzuki）以生產經濟實用嘅車仔享負盛名，例如旗下最新嘅環保揭背車Alto，就有齊易揸、低油耗嘅特點，加上車價唔使$12萬，好過盲舂舂攞幾萬蚊唔覺意買咗部牛肺二手車返嚟，整仲多過揸，到時後悔都嚟唔切！

日圓持續高企，每100日圓兌港元已經衝破$9，日本新車價難免上調，部分1.5公升級私家車，已經去到17萬元以上，同歐洲車嘅差距愈嚟愈近。至於Alto嘅定價為$119,900，同級中只有一款韓國車低於此價，算得上係最經濟嘅1.0公升日本Hatchback。純粹當係代步車，Alto絕對稱職，操控性比以往嘅Suzuki進步唔少，雖然未至於同Swift Sport相提並論，但比起Wagon R，已經好玩得多。不過車價咁平，就唔好期望有太多設備，有MP3音響及前座電窗已經係交足貨，一部新車12萬元都唔使就有交易，仲想點？

易操控、車價又平，啱晒新牌仔，尤其是女仔駕駛。	引擎着重低耗油表現，仲通過埋EURO5廢氣排放標準。	後排空間唔算窄，乘坐感都幾舒服。

車仔雖小 安全做到足

Alto體積細細，全長只有3.5m，不過後座出奇闊落，除非全車乘客都係六呎高，否則都唔會出現膝頭哥撞椅背嘅尷尬場面。至於尾箱容量只屬一般，夠放洗車桶、吸塵機，想運大型行李，只好收起後座、犧牲兩個座位。難得係車仔細，安全設計卻做到足，唔只有四個安全氣袋，車身仲採用咗先進嘅TECT系統，遇上撞擊時，車體藉潰縮設計吸收撞擊力，減低乘客受重創嘅機會。

座椅用咗花紋布料，都幾有少女Feel。	前排有側安全氣袋，提供周全保護。	錶板只設速度計，簡單到極。

窄路掉頭 一手軚搞掂

易揸、靈活，向來係細車嘅擅長項目，Alto都唔例外，佢嘅短頭冚加埋揭背設計，除咗睇位容易，短車身亦有利於窄路掉頭，最少轉向半徑只需4.5m，人哋要用三手軚，Alto一手就搞掂。動力方面，今代Alto嘅引擎容積已經提升到1.0公升，突破K-Car範疇，全新開發嘅直列三汽缸DOHC引擎採用多點式燃油噴注系統，最大馬力及扭力分別去到67ps及9.2kgm，性能未算強勁，只稱得上夠用，勝在耗油量低，平均低至16.7km/L，而且通過EURO5廢氣排放標準，認真環保！

車檔案

車　　型： 五門四座位揭背車

引　　擎： 直三DOHC

容　　積： 996c.c.

最大馬力： 67ps/6,000rpm

最大扭力： 9.2kgm/4,800rpm

傳　　動： 四前速自動波

驅　　動： 前置引擎、前輪驅動

懸　　掛： （前）麥花臣 （後）三連堅固軸

制　　動： （前）通風碟 （後）制動鼓

車身體積： 3,500×1,600×1,470mm

（長×闊×高）

軸　　距： 2,360mm

淨　　重： 0.915噸

售　　價： $119,900

查　　詢： 2332 0091（鈴木汽車）