舊年Cult王昆頓塔倫天奴拍咗套《希魔撞正殺人王》，一心諗住捧畢彼特做影帝，點知爆出個奧地利演員Christoph Waltz，憑住演活納粹軍官蘭達（Landa）一角，先後奪得康城影帝及奧斯卡最佳男配角；突然升呢，唔只片約接踵而來，連Hot Toys都打佢主意，新款12吋Figure就揀中呢位「猶太獵人」。

神似過畢佬

HT攞到電影版權後，早前已經出咗畢彼特演嘅「山番艾杜」（Lt. Aldo Raine），不過畢佬實在太緊張自己個靚樣，搞到最後成品木獨有餘，神韻不足。相比起嚟，Christoph就畀頭雕師Jeon Young Tae較大嘅發揮空間，配合JC.Hong塗裝及Kojun監修，無論軟膠頭髮、臉形或額上嘅火車軌都相當神似，而且略帶邪氣嘅眼神都忠實還原，忠實展現蘭達皮笑肉不笑嘅奸角特色。真係要雞蛋裏挑骨頭，就係真人嘴角微微向左翹，如今為求對稱而夾硬執走，追求Human-being嘅玩家，睇嚟牢騷難免。

矮身Body比一般Body矮0.5cm，着埋大褸，更顯得身材矮小。	Jeon Young Tae專雕奸人，上次雕T-1000已覺神似，今次都冇令人失望，希望大貨時Keep到啦！	Christoph喺戲中經常擺出呢個奸笑表情，但平時嘴角係有少少向左翹，如果Figure做埋呢點就更神似。

新製矮身Body

相貌神似，估唔到素體選材都咁認真，平常TrueType Body約有30cm高，不過Christoph身材較矮小，HT於是重新炮製一款矮身Body，身高只有29.5cm，驟眼睇，氣勢係差啲，不過造型更神似。服飾方面，HT以軍事人型起家，縫製蘭達身上嘅黨衞軍服，當然係Easy Job，衣領、心口袋嘅勳章更依足戲服設計，仲有齊軍帽、手套、軍Boot及黑色大衣等Parts，還原度相當高。不過，配件方面少得可憐，除咗Walter P38手槍、公事包及大煙斗外，就只有五隻可換手掌，計配件，輸畢佬成條街。

膊頭嘅軍階章、領口嘅部隊章、仲有心口嘅鐵十字戰功勳章，統統跟足電影戲服落齊。	傳統嘅長筒式軍Boot用人造皮製成，無論質感及光澤度，都可與實物相比。	配件唔算多，相比畢佬嘅大推頭Parts，真係輸蝕咗。
為咗擺出電影初段追殺女主角嘅姿勢，HT專登造咗隻揸槍手。