成日睇巨聲幫、獎門人等節目玩得咁高興，自己間中會發吓明星夢：「如果我係Superstar，要玩遊戲贏大獎、要周圍搵好嘢食、要拍好多廣告賺大錢……」估唔到PS3新一代體感遊戲《TV Superstars》，一次過就可滿足晒所有願望，拎住碌PS Move控制器郁身郁勢做明星，仲可一家大細爭做視帝視后。千呼萬喚嘅PS3體感遙控PS Move快將抵港，大量體感遊戲隨後殺到，不過初頭多以運動和動作類為主，想特別少少大可等吓呢隻10月先出嘅《TV Superstars》，拎住支PS Move扮咪做明星，再參加不同Party Game遊戲累積人氣，隨時大把廣告商爭住搵你做代言人。

真樣上陣夠投入

雖然巿面有唔少扮明星遊戲，可惜大部分見唔到自己個真樣，因此《TV Superstars》特別利用PS Eye鏡頭，拍低玩家個樣Key入角色，好似自己上電視一樣，投入感已拎滿分，再睇埋Party Game內容有唱歌表演、綜藝遊戲、烹飪節目、家居裝修和廣告拍攝，畀玩家過足明星癮。

上到舞台跟住節拍揮動PS Move，展現你的舞姿及台風就可拎到高人氣。

分數愈高所得的人氣愈勁，仲有機會上埋雜誌封面，咁就大把廣告等你接拍。

勁歌表演騷台風

話明係《TV Superstars》，梗係要上台表演顯功架，在類似勁歌節目嘅「Frock Star」中，就算唱歌冇巨聲幫咁好聽，都可以上去騷台風，只要拎住支PS Move跟隨節拍和畫面指示邊Fing邊跳，就可贏取分數，分數愈高人氣自然愈勁，隨時仲會上埋雜誌做封面。

另一遊戲要將自己變成空中飛人，擺定甫士射向目標，撞得應棍就拎高分。	在巨轆Fing住PS Move加速，不時會有障礙物要跳過，唔小心就跌到一仆一碌。	PS Move手掣同Wii一樣，玩之前記得綁好手帶，唔係激過頭飛爆電視就無謂。

上獎門人玩遊戲

明星閒時都會上綜藝節目，爭取人氣順便贏巨獎，遊戲內都有「Let's Get Physical」讓玩家一展身手，開始時會跳上個巨轆，Fing住PS Move控制加速，之後要邊跑邊跳過障礙物，玩完肯定一身汗；過完呢關仲要做空中飛人，擺好甫士射向目標，激過獎門人爆波波。

明星都要有時尚品味，成間屋由鑿牆、噴漆到布置，由你一手一腳搞掂。	Big Beat Kitchen玩法同《Cooking Mama》有9成相似，但感覺靈敏度更高。	煮嘢煮到一半，就有位大廚出來Rap一餐，跟住佢郁來郁去先至能夠煮到美食。

粉紅救兵搞裝修

外國有套《粉紅救兵》專幫人執靚間屋同個Look，這裏「D.I.Y. Raw」玩法亦有幾分相似，不過由鑿牆、鋸木、噴漆到布置家居等，都要自己一腳踢，將個PS Move手掣變成錘仔、木鋸和油漆掃等用途，限時內整得愈靚就愈高分，仲可獲得特殊道具和廣告合約。

體感套裝包括PS Move控制器、PS Eye鏡頭及三揀一遊戲。售價：$699。	接拍廣告時，只要跟住導演指示就搞掂，衰咗仲可以Take 2補拍。	創造角色時可用PS Eye拍低自己個樣，玩遊戲時便會見到你的不同表情。

Rap版Jamie教煮飯

想做師奶殺手的話，就必定要上「Big Beat Kitchen」節目教煮餸，驟眼睇雖則有點似《Cooking Mama》，都係拎住PS Move打蛋、加調味料、拿鑊鏟煮美食，但中途會有個大廚出來同你Rap，按佢指示左右咁郁先至整得好食，頗有外國名廚Jamie Oliver風範。

代言人接拍廣告

當人氣和道具儲到咁上下，就可到「Super Television Acting Agency」接拍廣告，小記玩咗成粒鐘先拎到個洗潔精廣告，去到Studio跟住導演Fing支PS Move，吓掣噴洗潔精出來就搞掂，你睇柴九哥都係拍清潔用品廣告入屋，就知做代言人有幾過癮。

遊戲檔案

類　　型：Party Game

開　　發：Cambridge Studios

平　　台：PS3

遊戲人數：1-4人

推出日期：2010年10月

售　　價：待定

查　　詢：2341 2356