人氣漫畫《海賊王》（One Piece）在日本已賣出1億9,500萬冊，打破《龍珠》紀錄，連帶玩具、精品、映畫都大收旺場，可惜巿面Figure來來去去只見唔識郁的POP和盒蛋系列，想換個靚仔甫士都唔得。

近日終於等到人形可動系列SHF（Super Hero Figuarts）出手，以主角兩兄弟路飛和艾斯打響頭炮，唔知幾時能夠集齊卓洛、索柏、奈美成班船員呢？

既然是路飛Figure，草帽當然少不了。

「肉呀~」看到美食雙眼便會發光的路飛，確搞笑！

橡皮人施展巨人之拳

數數手指，POP《海賊王》Figure出過幾十款，由草帽團、童年版到Strong Edition，頭雕造型靚就靚，但Size超巨型兼純擺設款式，實際可玩性唔高。忍手咁耐，終於等到SHF出《One Piece》，單係主角路飛，就有五款臉部表情畀你換，最正係右手可以裝上必殺技「巨人之拳」，配件比SHF之前的幪面超人系列更多、更好玩，最重要是承繼埋其可動雙關節設計，手腳鉸位均可作多角度擺動，連腳掌都有關節屈曲，擺出「換檔」或「橡皮槍」等戰鬥甫士，都唔怕跌低。

今次SHF賣大包，除有兩款頭髮造型，還有五款臉部表情。	右手可換上「巨人之拳」，只係隻手重得滯，影相時要吊起。	手腳均有雙關節，屈身擺甫士更易，連「換檔」都掂。

火拳艾斯白鬍子紋身

漫畫第一部大航海時代剛完結，路飛大佬艾斯可說是焦點所在，雖然玩具迷網上圍插艾斯頭雕跌晒Watt，但好在SHF肯落重本，附送大量手部和飾物配件，淨係手掌就有十隻畀你換，仲可以喺手腳加上透明火燄裝飾和火燄指槍，切合「火拳」艾斯個朵。至於手腳關節和素體設計就與路飛一樣咁靈活，背部印埋白鬍子海盜團紋身，兩兄弟拍住上夠晒煞食。

雖然艾斯嗰樣做得唔係咁似，但背上白鬍子海盜團紋身做到足。	附送十隻手掌、火燄效果裝飾、帽子和刀等配件，可做出火燄指槍攻擊。	兩款《One Piece》Figure均有「初回限定」的印字底座，之前SHF幪面超人都無o架！

查詢：2433 1828（瑞華行）