相信唔少人學車時都會跟足規矩，但係出牌之後、揸車日子耐咗，啲壞習慣就會愈來愈多，好似坐姿、扭軚等駕駛姿勢，都會亂咁嚟，唔只會影響健康，甚至乎危及駕駛安全。今次一於同大家執番正啲駕駛姿勢，為人為己，唔懶得o架！

雙腳伸直　踩Brake唔夠力

開車之前，記住校好座位與腳踏之間嘅距離，一般嚟講，背部能夠緊貼椅背就最Fit，而且椅背微斜便可，切勿太斜，咁就坐得夠直又舒服，視線亦自然Keep住向前。除此之外，當左腳將離合器完全踩低，或者右腳完全踩低迫力時，腳部應該仲可以保持微曲狀態，如果腳踏與座位嘅距離太遠，令雙腳伸得太直嘅話，遇上緊急情況，雙腳就未必夠力踩實離合器去拖波減速，以及踩Brake停車。

校啱軚環　咪阻視線

校啱座椅距離之後，咪唔記得校埋軚環高低，尤其是新車落地，或者之前借過部車畀人揸；事關軚環高低位置不當，唔只會阻礙行車視線，亦會影響雙腳動作，意外風險打孖上。咁講法，點先算係正確嘅軚環位置？記住以下呢三點啦：

1. 手腕關節位可以啱啱好放喺軚環頂端；

2. 軚環底部唔會頂住雙腳；

3. 頂部唔會擋住前方視線。

直手揸軚　手肘易出事

校好堂軚，又應該點揸？首先雙手應該握喺兩點及十點鐘位置，手肘保持微曲，而且唔好貪型，將椅背校斜、令雙手伸直晒揸軚，呢種打機Look其實好危險，急速扭大手軚時，會限制咗扭軚角度，而且正面撞擊時，手肘仲會「受晒力」，引至嚴重嘅肌肉及筋骨損傷，千祈咪試！力度方面適中便可，千祈咪出盡力咁揸，事關真係有意外發生，好似突然「搶軚」嘅話，輕則扭傷手，重則甚至扯斷手指。扭軚過彎時，就要用一手拉、另一手接嘅「豬腸軚」方式，一手接一手咁轉，千祈唔好交叉手或者反手，甚至淨係用手掌去推轉軚環，有唔有型就唔知，不過統統都揸唔實堂軚，好危險囉。至於手汗多嘅朋友，就要考慮戴防滑手套喇！

汽車查詢：2511 2727