Jeff：

前排去紅館睇Concert，路過Poly U見到打晒蛇餅，起初仲以為有金執，好奇心驅使下走去八吓，見到十幾個Counter企滿晒人喺度拆盒試Notebook，才想起又係每年一度的Notebook學界優惠！就以Fujitsu為例，指定型號竟然可以做到5至7折優惠咁平，難怪啲人等成粒鐘都咁開心，上去Forum兜個圈更見到唔少人兜售Quota或者即刻轉手圖利，確係「一家便宜兩家着」。

嬌拔：

最近「唉瘋4」全城熱搶，水貨癲到炒上兩萬幾蚊，以為行貨推出後炒風會回落，估唔到依家仲炒緊！早兩日，先達16GB回收價仲企硬喺$6,400，而32GB就收$7,400，水位有成$1,400至$1,500，認真和味！而據場中大拆家Lo哥表示，就算傳聞大陸聯通今個月開售，在供不應求下，相信香港炒家仲有得執；加上Apple揚言9月30日前買機唔啱可以退貨，可以話封晒蝕本門。小記朋友「發錢寒」，碌爆卡都要加入炒機大軍，這令小記明白到原來香港人最叻都係揸鑊剷。

貓科：

唔講唔知，原來Denon已創立了成百年，為紀念100周年，日本Denon推出百周年紀念版A100系列，A100不是一款產品，而是針對該廠最受歡迎的7款機種而推出的一系列紀念版產品，包括，AV擴音機（AVR-A100）、BD機（DBP-A100）、音響擴音機（PMA-A100）、SACD/CD機（DCD-A100）、黑膠唱盤（DP-A100）、唱頭（DL-A100）、耳筒（AH-A100），售價由超過30萬日圓（約HK$25,000）的DP-A100，至只賣52,500日圓（約HK$4,200）的DL-A100不等，預計11月1日於日本發售，各位Denon迷係時候揀定入貨目標。