農曆七月，鬼門關大開，最易惹到污糟邋遢嘢，好似筆者最近就撞到「嘢」，佢成頭着火不特止，仲着黑皮褸扮晒型，加埋部火氣沖天嘅鐵騎，夠晒嚇鬼！一般人見到實走夾唔抖，不過睇真啲，皆因製作實在太精美，唔只唔驚，仲想即刻帶佢返屋企。究竟講緊乜？咪係Hot Toys新推出嘅12吋Ghost Rider囉！

生化造型師處理

《Ghost Rider》（港譯《幽靈車神》）喺1972年於《Marvel Comics》正式連載，其後改編成電影，雖然口碑同票房都麻麻，但係骷髏頭魔嘅造型，就迷倒唔少玩具迷，其中ToyBiz、Hasbro及Medicom都出過玩具，就以Medicom最神似。等咗咁耐，版權終於落到HT手上，先唔講Nicolas Cage個頭係由GOX落刀、Kojun監修及JC.Hong上色，並經過四個初版先至完成，像真度爆燈；原來骷髏頭及電單車，仲係本地著名生化造型師Joseph Tsang手筆。據Joseph講，要呈現骷髏頭亦正亦邪嘅風格唔難，難在火燄並冇固定形態，於是Joseph用半透明PVC膠，打造多層Layer，模擬出熊熊烈火，又喺頸上加入LED燈，玩埋發光功能，唔逼真就假！

前臂嘅窩釘用人手逐粒縫上，唔似其他廠商直頭唔整咁求其！	選用窄膊Slim Body，關節位多達30個，着埋皮褸依然活動自如。	配件包括鎖鏈、霰彈槍及兩對可換手掌，數量唔算多。

終於有烈火戰車

雖然有名你叫Ghost Rider，但出親玩具都冇咗部戰馬，點講都唔通！所以HT力求完美，索性造埋部「烈火戰車」出嚟。實物所見，電單車跟足電影設定，由把手、Seat位到死氣喉都雕滿Bio Tech花紋，而且前後輪都用ABS膠料製成，兩個車輪都轉得郁，唔係得個擺字！服飾方面，黑皮褸緊身得嚟仲有少少虛位，擺大動作甫士都唔怕「爆軚」，最細心係膊頭、前臂都有窩釘，而且全部用人手逐粒縫上，單係呢份心思，已經值回票價。不過有讚都有彈，隨盒配件實在少得可憐，除咗條星雲鎖鏈外，只得一把霰彈槍及兩對可換手掌，如果你玩慣大堆頭Parts嘅話，惟有另購補品了！　

Joseph Tang擅長雕刻異形、血獸，處理骷髏頭就易如反掌，火燄反而最棘手，最後用半透明PVC軟膠完成，效果逼真。	兩個車輪都轉得郁，而且正式推出時，所有火燄位都會加入燈泡，着晒燈嗰陣，絕對型爆！	全車都雕滿Bio Tech花紋，死氣喉位仲勁有立體感。

慢工炮製

憂鬱Look

Ghost Rider人連車嘅組合，其實一早完成，拖到依家先公開，皆因HT要將Nicolas雕到最神似為止，圖中為最終版本，臉頰比初版細，雙眼亦略為垂下，神情更憂鬱。

＊圖中為試辦款式，與正式推出的版本或有少許分別。