以往打空戰遊戲，一嚟就揸住架戰機埋牙在空中互相追逐駁火，過癮還過癮，但始終唔似《Flight Simulator》咁可以畀大家玩起飛或降落。今集《Tom Clancy's H.A.W.X 2》就畀大家可以駕駛戰機在機場或航空母艦上升降，仲可以在空中跟加油機「合體」加油，甚至用埋夜視系統在半夜出擊偷襲，論挑戰性同真實感都勝過其他同級空戰遊戲！

跟兩年前嘅第一集一樣，《H.A.W.X 2》同樣係由軍事小說家Tom Clancy喺背後發功，故事背景以至場景設計都做到既有說服力，亦好有張力。

中東打到挪威海峽

今集故事設定在2030年，因為俄羅斯核彈頭被偷走而引發一連串危機，一股神秘勢力想趁亂奪取俄國政權兼入侵挪威，繼而威脅世界安全，各國都急謀對策。要應付呢場一觸即發嘅世界性危機，遊戲就要玩家扮演英國皇家空軍、俄羅斯空軍同美國「H.A.W.X」三支空軍嘅飛行員，由中東打到去蘇格蘭、莫斯科、北海同挪威海峽，駕駛各國王牌戰機，慢慢揭示呢場陰謀嘅來龍去脈。

空中「合體」加油

點解今集會諗到加入起飛、降落等元素？據開發小組所講，佢哋蒐集咗玩家對第一集嘅意見，覺得真實感未夠，而最多玩家想加入起飛同降落，所以今集就一次過加入幾個新玩法。要在機場跑道或在航空母艦起飛唔太困難，只要沿住地面嘅黃線駕駛入跑道，然後踩盡油門到指定速度後拉起操控桿就可以起飛。相較之下，在空中加油就困難得多，於指定時間內追上前面嘅空中加油機，再要在空中微調位置對準輸油管「合體」加油，筆者第一次玩時只能在最後一秒成功「合體」。另外遊戲亦加入黑夜出擊新玩法，用上夜視系統在漆黑環境下打空戰，難度都幾高。

地圖夠大又精細

之前都講過今集會由中東打到去蘇格蘭、莫斯科甚至南非開普敦等地，跟上集一樣同專門製作衞星地圖嘅GeoEye公司合作，城市面貌同沙漠、高山等地形全部都造得相當精細，比Google Maps靚上好幾倍，在半空中都可以清楚見到地面上嘅樓房；而且每幅地圖都有成130km×130km咁大，單係高空追逐戰都有排玩。遊戲入面有英國空軍、俄羅斯空軍同美國「H.A.W.X」空軍任務，當然仲有大量真實戰機畀大家揸，由F-16C Fighting Falcon、F-35 Lightning II、Su-37、Eurofighter Typhoon，到經典嘅F-117 Nighthawk同F-14A Tomcat都可以任大家揸住四圍舞。除顧及真實感外，《H.A.W.X 2》亦繼續沿用戰略輔助系統，新手都唔會畀略帶複雜嘅操作嚇倒，仲可以玩埋四人合作或最多八人對戰嘅連線模式，打得爽！

遊戲檔案

類　　型：空戰

開　　發：Ubisoft Romania

平　　台：Xbox 360、PS3

推出日期： 9月2日（Xbox 360）

9月9日（PS3）

售　　價： $359（Xbox 360）

$388（PS3）

查　　詢： 2359 7998