西甲同意甲都喺本周六開鑼，加埋之前嘅英超，從此個個Weekend捱更抵夜睇波嘅日子又返嚟。筆者問過球衣店老闆，近期最好賣嘅球衣同燙字，都離唔開巴塞美斯同曼聯嘅「小豆」，不過講真，各大球會球衣都有行貨，未夠特別。今次筆者就帶大家去旺角掃街，反而搵到啲特別嘢，由球衣、球會精品、球員模型以至球證用品，幾乎只此一區有得賣，其他地方都幾難搵到，而且三間舖嘅行程，相距只係幾分鐘，一個晏晝行得晒！
SFALO飛龍 J League集中地
日本J League球衣，由款式以至用料都特別靚過人，不過由於香港無行貨返，而且一件閒閒哋都定價超過10,000日圓，所以香港好少舖頭返貨。好彩仲有SFALO，既有各大歐洲聯賽球衣外，仲入咗多款今季嘅J League球衣，包括鹿島鹿角及京都不死鳥等勁旅，同步仲入埋唔少球會及日本國家隊紀念品，J League迷唔使周圍撲。
查詢：2390 0004（a）
352大本營 球星Figure專家
早幾年都幾興Q版球星公仔，不過近幾年唔多見有新公仔出，問過352店員，佢話好多已經唔再出，店內嘅球星公仔都係賣完就無。雖然冇新貨，但一啲經典球星公仔仍然有價有市，好似細細個嘅施丹就開價$250，差不多係原價10倍，識貨球迷仍然心甘情願掏腰包。除咗球星公仔，352仲入咗唔少球證裝備，由哨子、黃牌、摘名紙、摘名筆都一應俱全，即使唔係全港唯一，都幾難搵到第二間舖有得賣。
查詢：2770 7352（b）
球迷世界 英超專門店
英超Big4球衣唔難搵，大型連鎖運動用品舖都有得賣，但想搵件曼聯或阿仙奴龍門波衫就難好多，好在球迷世界特別從英國入口未有行貨嘅英版球衣，連今季紐卡素、保頓球衣都有貨返。球衣之外，仲入埋英超Big4嘅球迷紀念品，部分產品仲係球會嘅Mega Store先有得賣，最啱做生日禮物送畀球迷朋友，唔知幾時會入埋唔同球會嘅一號足球呢？筆者最鍾意儲一號波嘛！
查詢：2369 7822（c）
Best Picks
成呎高碧咸Figure
碧咸仲會唔會着AC球衣就真係唔知，但呢款成呎高嘅碧咸手辦公仔，都真係造得好神似，連頸上紋身都做得足。球迷世界老闆Hugo話係朋友親手造，擺喺度寄賣，賣完就無！（c）
J League京都不死鳥球衣
雖然球隊成績麻麻，只屬中游分子，不過波衫印咗「特別」嘅贊助商名字，並非正面嘅「京瓷」，而係背面同屬京都嘅「任天堂」，Game迷見到分外鍾意。
曼聯龍門球衣
今季換咗贊助商嘅2010-11年度曼聯龍門波衫，不過行貨仲未有，坊間少見，好在球迷世界特別從英國引入，不過早幾晚雲達沙就係着住佢畀富咸入兩球，唔多「老利」喎！
2010世盃頸鏈
雖然世界盃已過，但一條繡上參戰今屆世界盃國家隊國旗嘅頸鏈，都幾有紀念價值吖，32隊都有齊，包括冠、亞軍得主西班牙同荷蘭，以及冷門嘅北韓及洪都拉斯。
adidas球證哨子
何謂「日本音色」嘅球證哨子？唔明都唔緊要，呢款由adidas出品嘅球證哨子，標榜日本製造，造工一流，仲有小型收藏盒，感覺幾Grand，喺香港好難搵。