汽車冷氣出現難聞氣味，主要成因係霉菌喺冷氣系統管道內孳生，尤其是潮濕嘅春、夏季節，繁殖速度更快，惡頂之餘，仲會影響車主及乘客嘅健康。唔想車廂變成毒氣室，就要對症下藥，幫車廂冷氣急救一番！

呢排日日天陰陰，除咗落雨落到人都煩，車廂嘅冷氣系統被細菌攻陷嘅機會亦都大增。除此之外，經常喺車內吸煙、飲食，又懶換冷氣過濾網，都係導致冷氣變臭嘅成因。

噴注式清潔劑

好彩市面上有唔少專門清潔冷氣系統嘅用品，一般都係噴注式，有去除細菌及異味嘅功效，同時亦能清潔蒸發器（俗稱凍Coil）。即使冷氣系統未有異味出現，車主最好都每年清洗一次，保持系統清潔，但又唔好過於頻密，以免有過量清潔劑積存喺冷氣系統內，令製冷性能受損。

每半年換風隔

除咗清洗冷氣管道，仲要定期更換冷氣過濾網（俗稱冷氣風隔）。冷氣過濾網嘅作用係過濾空氣中嘅細菌，以及阻隔懸浮粒子、塵埃、昆蟲，甚至係樹葉碎片等「垃圾」進入冷氣系統，久而久之，垃圾愈積愈多，過濾網就會失去功效，車廂空氣質素唔變差就假。一般嚟講，每半年就要換冷氣風隔一次，如果經常去郊區或多塵嘅地方，就要換得密啲喇！

保持清新小貼士

方法1

落雨自然會整濕車廂及地氈，最簡單嘅善後做法係利用車內暖氣機將水分吹乾，首先啟動引擎及暖風機，開盡暖氣及風速，並吹向地氈或車內最潮濕嘅位置，同時校低少少玻璃窗，畀蒸發咗嘅濕氣流出車外。當車廂乾到七七八八，就可以將香精座放入去，然後緊閉門窗再焗一陣，就做到除濕、除臭嘅效果。不過緊記由死氣喉排出嘅一氧化碳會致命o架，所以一定要喺通風地方進行，仲要記住引擎熄火後，順手熄埋暖風機，否則電池好易被「扯乾」。

方法2

先準備絲襪或薄身布袋，再將適量晾乾後嘅茶葉渣放入去，然後擺喺車內，亦有除臭功效。其實檸檬亦有同樣功效，先切開檸檬，再放喺冷氣出風位置，唔只辟味，仲可以令車廂散發清新檸檬味。

用品推介

Carmate消臭吸味座 $65

無味無色，首先撕去罐內封紙，再放喺座椅底部就搞掂，仲有銀離子及極炭消臭兩種款式，同樣有強力辟臭效果。

Carmate罐裝消臭彈 $65

辟味兼有除菌功能，過程只需十分鐘左右，用後車廂仲會留低陣陣微香。

Carmate銀離子除臭噴霧 $58

喺車內輕輕一噴，內裏嘅銀離子就能夠徹底清除臭味，而且噴霧混雜咗香料，令車廂變得清新芳香。

Taih Kohzai汽車冷氣清洗劑 $110

專門對付冷氣系統內嘅細菌、霉菌及對人體有害嘅物質，仲有清潔凍Coil嘅功效。

PMC冷氣過濾網 $280

可按車款選擇尺寸，有助阻隔塵埃、花粉等容易令呼吸系統敏感嘅物質進入車內，令車廂空氣保持潔淨。

查詢：2392 4244

（台日汽車精品）