每年動漫節一過，市場又再增添新連載漫畫，搞到小記身邊啲宅男朋友追完一本又一本。雖然咁做無可厚非，但除非閣下將來想開漫畫屋，否則咁買法真係嘥錢又嘥位。想慳？不如試試用iPhone/iPad睇電子版，不但風雲跳出框框跟大家互動，仲有老夫子及美國英雄排住隊等你睇；漫畫迷，係時候改變閱讀習慣了！

《風雲II》聲畫互動

香港有唔少《風雲》擁躉，但睇足咁多年平面，就算畫功幾好都會悶。有見及此，官方終於推出電子版，雖然內容只係將早前推出的電影漫畫移植過來，但就新增了互動元素，例如海鷗飛過、雙劍互劈時會有聲畫效果，睇得更投入。官方更表示日後會把電子版推廣至整套《天下畫集》，Fans要密切留意了！

下載費用︰免費

《老夫子》復刻重生

《老夫子》風靡香港45年，繪本最近終於跳到iPhone上。程式為《老夫子》的精選集，收錄多年來較受歡迎的4格及6格作品，並由王澤重畫部分封面、彩稿及黑白漫畫，單是這些因素已值得收藏。另外，App Store還有整套《老夫子水虎傳》漫畫供下載，若當年冇入場睇，依家就有機會重溫經典。

下載費用︰免費

《Comics》增強迫力

用iPhone睇漫畫，除慳位外，最重要係帶來嶄新的閱讀體驗。好似呢款《Comics》便注入了Guided View技術，不但懂得逐格播放，當情節進入高潮時，還會放大畫面增強迫力，令漫畫變得甚有電影感。另一賣點係藏書量多達2,000本，當中有齊DC Comics、Marvel等名著，唔理蝙蝠俠定狼人，以後去到邊都話睇就睇！

下載費用︰免費

《漫畫の新聞》模擬圖片

日本係漫畫王國，故此新聞漫畫化一啲都唔出奇。《漫畫の新聞》由日本50位大師親自繪畫，將每天發生的政治、時事、經濟、民生及科技新聞畫成漫畫，再配以生動旁白，比《讀賣》、《朝日》等報紙版，更容易消化。

下載費用︰免費

《iComic Viewer》直讀檔案

《iComic Viewer》內並冇任何漫畫，它其實是一款閱讀器，可直讀網上流傳的CBZ或ZIP漫畫檔案，並把內裏的圖片解壓出來顯示，因此基本上只要找到檔案來源，任何漫畫都可以免費睇。它還支援放大縮小或全屏幕觀看，用戶更可預設起首位置，例如選擇由左上角還是右上角開始閱讀，以對應各地不同的排版方法。

下載費用︰免費

《How2Draw Manga》 修練畫功

好多漫畫迷都夢想過做漫畫家，只係缺乏基本功，結果不了了之。這款《How2Draw Manga》就畀個機會大家自學畫人像，它由巴西著名漫畫家Fabio Yabu設計，以清晰簡單的畫面，展示男女生不同角度的基本繪畫方法，而且每個角度都附有圖畫及文字說明，讓用戶一步一步打好根基。

售價︰US$0.99（折約港幣＄7.7）