香港出名係美食天堂，但唔少女仔認路好差，一個人搵食經常要打畀好姐妹求助。不過依家有新科技幫手，好似Samsung新機Galaxy 580就預載咗Layer實境導航功能，輸入目的地就有3D立體圖幫你認清位置同距離，以後想蕩失路都幾難！

雖然 Galaxy S係Samsung目前最頂級嘅Android機之一，不過賣成五千幾蚊，好多人情願揀iPhone 4。幸好Samsung嘅旗艦機都有入門版，以這部Galaxy 580為例，雖則規格有所下降，但Android 2.1介面及大部分程式都保留下來，最重要係售價便宜一半，預算有限的話可以考慮。

採用拋光機面，光線打在機面時會反射出不同顏色，惟此設計容易沾上手指模，有辣有唔辣！	SIM卡槽設於機側，但唔好以為可以Plug & Play，每次換卡都會自動重開，極其量只係慳番拆電嘅工夫。	機面按鍵不多，中間係確定鍵，兩側的設定及返回鍵則屬熱感按鍵。

實境導航搵食

Layer實境導航由上代移植過來，簡單來說係增強實境（Augmented Reality）技術的一種，用戶開啟程式後，先要輸入關鍵字如麥當勞，此時手機便會開啟鏡頭，將實境與導航資訊互相結合，並以黃點顯示目的地位置，行得愈近，黃點就愈大，跟住行就包冇錯。除搵食以外，程式還提供櫃員機、投注站及旅遊景點等興趣點（POI）位置，甚至可搵出附近Twitter用戶嘅所在地，玩法相當多變。惟留意此技術需要不斷下載數據，唔係用無限數據月費嘅朋友就唔好玩，另外手機對應3.5G及802.11n無線網絡，保證行到邊都可極速連線。

內置記憶體僅得153MB，好彩可加裝最多32GB microSDHC卡。

提供黑、白兩款機背顏色，尾部微微向上翹，手感唔錯，情侶一人一部就啱啱好。

強化文書處理

除了實境導航，Galaxy 580還強化了文書處理功能，好像預載了《ThinkFree Office Mobile》，不但可直讀doc、xls及ppt等文件檔，還提供編輯功能，遇到緊急文件都可立即修改，比常見於Android手機、齋睇冇得改嘅《QuickOffice》實用得多。另外，它加入了Swype快速英文輸入法，按實虛擬QWERTY鍵盤便可一口氣輸入多個字元；配合Write and Go功能，入完可同時發送到SMS、電郵及Facebook，慳番唔少時間。

小記喺尖沙咀嘗試搵麥當勞，Layer實境導航就會將最近嗰間的位置以黃點顯示出來，跟住行就搵到。	Daily Briefing能即時更新天氣、股票及新聞，猶如多了個小秘書跟身。	播歌介面可顯示唱片封套、歌名及歌手等資料，戴住耳筒聽還可享受5.1聲道音效。

多重曝光效果

鏡頭方面，雖然像素由500萬降至320萬，並跟Galaxy S一樣欠缺補光燈，但大部分攝影模式都被保留下來，例如一笑即拍、連拍、全景、動作拍攝等，當中「加入我」模式可模擬多重曝光效果，將兩張相片互相重疊，效果相當過癮！至於介面方面，已升級成TOUCHWiZ 3.0，最多可放7版Widget，雖然Social Hub被抽起，但Daily Briefing則保留下來，畀你喺同一頁面睇晒股價及新聞，大忙人必備。

對應3.5G及802.11n無線制式，上網速度快，而且顯示冇走位，問題係電阻式屏幕反應麻麻，操作唔夠 利落。	Layer實境導航可搵出多種興趣點，就連附近有咩人玩緊Twitter都一目了然。	影相模式多了一個「加入我」模式，影相時先拍左邊，之後再拍右邊，手機便會將兩張相重疊起來，一個人都可變成雙生兒。

查詢︰3698 4698

機檔案

制　　式︰GSM四頻、WCDMA

操作系統︰Android 2.1

屏　　幕︰3.2吋1,670萬色TFT

（240×400解像度）

鏡　　頭︰320萬像素自動對焦

記　憶　體︰內置153MB、支援microSDHC記憶卡（最高32GB）

對外連接︰藍芽2.1、USB 2.0、3.6Mbps HSDPA、Wi-Fi

通話時間︰14小時（2G）、

6小時（3G）

備用時間︰600小時（2G）、

556小時（3G）

體　　積︰113.5×55×12.55mm

重　　量︰113g