結婚揀回禮小禮物頗令新人頭痛，送蜜糖朱古力又冇乜紀念價值，送水晶擺設似乎唔多實用，所以近年環保回禮迅速冒起，由各式各樣的蛋糕毛巾到綠色植物都有大量選擇，有設計師仲諗到將種子放在迷你金蛋內，讓親友帶返屋企開花結果，夠晒Gimmick又好意頭。

回禮除了代表對親友的一份心意，更可為婚宴留下美麗回憶，因此今次便專程到森珀設計和Joyful Gifts兩間專做小禮物的設計公司，睇吓店長近排有乜新貨推介。各位如想入貨的話，記得需要150件起，並預留一個月左右製作時間，一般未必有充足現貨。

金蛋送包裝心意卡

有見環保成為近年大趨勢，連結婚回禮都趕上這浪潮，創作出植物金蛋這概念，既迎合都巿人綠色生活要求，又可滿足長輩「生金蛋」好兆頭。只要將金蛋的陶瓷頂部開口淋水，便能種出各式迷你植物，由最多人揀的魔豆到士多啤梨和番茄等，最吸引是附送埋包裝和心意卡，唔使自己郁手咁麻煩。

造型毛巾夠實用

特色毛巾亦是年輕新人熱門之選，當中尤以食物造型較受歡迎，將毛巾包裝成蛋糕、壽司、波板糖等，單睇外表經已吸引，還可讓親友帶返屋企，鼓勵平日以毛巾仔代替紙巾，增加環保意識，確實一舉兩得。

卡通設計禮物包裝

如想為禮物加添個人色彩，巿面亦有公司幫新人設計卡通頭像，就像Joyful Gifts只需$300稿費，擺低張相做參考便可製作卡通嘜頭，拎來印帖或包禮物肯定令人留下深刻印象；同時連包裝用的絲帶都可印番自己個名和簡單花紋，這樣獨特禮物就肯定唔怕撞款。