各位男車主，你哋放心借部車畀女士揸嗎？有外國調查網站成功收集咗3,000份問卷，有三分之一嘅男士對於另一半開車覺得唔安全，認為佢哋反應慢、容易分心、制動過遲以及控制油門力度唔妥當；同時有五分一人仲話，當另一半開車時，全程都無法放鬆，甚至因對方嘅駕駛態度發生爭拗。不過其實女士揸車唔係想像中咁有問題，根據英國保險公司Diamond董事總經理Sian Lewis分析，個案顯示無論男或女，交通意外都時有發生，分別只係女士較多慢車碰撞，而男士就涉及較多高速意外。咁講法，其實男士比女士揸車更危險喎！